Google Wallet صار متوفر بلبنان! هيدا كل شي لازم تعرفوه

بعد سنين من الانتظار، Google Wallet انطلق رسميًا بلبنان، وفتح المجال قدّام مستخدمي Android لإستعمال ميزة الدفع من دون تلامس من تليفوناتن.

الإطلاق صار بـ24 حزيران 2025، بنفس الوقت مع دول تانية متل الأردن، باكستان، قطر، وجنوب أفريقيا، وبيشكّل توسّع كبير لخدمات الدفع الرقمي من Google بالمنطقة.

هيدا كل شي لازم تعرفوه:

كيف تستعمل Google Wallet و Google Pay بلبنان

1.Google Wallet لحاملي بطاقات Mastercard من بنك عودة أو Neo Digital

لأول مرة، بنك عودة وNeo Digital Bank صاروا بيوفّروا خدمة Google Pay بلبنان. إذا معك بطاقة Mastercard من واحد من هالبنكين، فيك تضيف بطاقتك على Google Wallet وتستعمل تليفونك Android لـ:

– الدفع بدون تلامس الأجهزة بالمحلات بلبنان وبرا لبنان
– التسوّق أونلاين
– الدفع داخل التطبيقات

الإعداد سهل: بس افتح تطبيق Google Wallet، كبس على “Add a card”، وتابع التعليمات لتضيف بطاقتك من بنك عودة أو Neo.

هيدا تقدم كبير بعالم البنوك الرقمية بلبنان، وبيسهّل الدفع السريع والآمن لآلاف المستخدمين.

2. Google Pay لحاملي بطاقة Visa من Whish

إذا عندك بطاقة Whish Visa، كمان فيك تستفيد! Whish Money، من أهم شركات التكنولوجيا المالية بلبنان، أعلنت إنو بطاقاتها Visa صاروا بيشتغلوا مع Google Wallet.

يعني فيك تدفع بالمحلات أو أونلاين من خلال تليفونك الأندرويد. الطريقة كمان بسيطة: نزّل Google Wallet، اكبس “Add to Wallet”، وكمّل الخطوات لتضيف بطاقة Whish.

الإطلاق إجا بنفس وقت يلي Google Pay صار متاح بلبنان، وعم يقدم لمستخدمي Whish طريقة أريح وأجدد للدفع محليًا وعالميًا.

Google Wallet وGoogle Pay انطلقوا بلبنان… وApple Pay بعدها!

إذا أنت من مستخدمي الآيفون أو منتجات آبل، لازم تعرف: مع إنو Apple Wallet موجودة بلبنان، بس Apple Pay بعدها مش مدعومة من البنوك المحلية. يعني Google Wallet وGoogle Pay عم يوفّروا خدمات بدل عن Apple Pay بلبنان.

شو بالنسبة للأمان؟

إذا عم بتسأل أديه آمن، Google Pay بيجي معه عدة ميزات أمان مدمجة ومصممة لتحمي معلوماتك بكل عملية شراء.

بدل ما تشارك رقم بطاقتك الحقيقي لما تدفع، Google Pay بتستخدم عملية اسمها الترميز. هيدا يعني انو تفاصيل بطاقتك الحساسة بتتبدل برمز رقمي فريد. وكل عملية شراء بتوافق عليها من خلال رمز أمان بيتغير مع كل عملية دفع، وبهالطريقة بصير كتير أصعب لأي حدا يسرق معلوماتك.

وغير هيك، رقم بطاقتك الفعلي ما بينحفظ على تلفونك ولا بيتشارك مع البياع.

ومع الوقت، أكيد رح نشوف بنوك لبنانية أكتر عم تدعم Google Wallet.

شوفوا كمان، قرض الإسكان صار 100 ألف دولار، وهيدي الشروط المطلوبة!