6 تطبيقات لبنانية مفيدة لازم تكون ع تليفونكن

بتعرفوا إنو في كتير تطبيقات لبنانية مفيدة بالسوق، بتسهّل عليكن شغلات مختلفة بحياتكن؟ قررنا نجمعلكن أبرزها بمقال واحد ونحكي عنن بالتفصيل (مع روابط التنزيل من App Store وGoogle Play).

1. MoodiMe

تطبيق مميّز بيساعد ولادكن يعبروا عن مشاعرن بسهولة وراحة. والأحلى إنو كمان مناسب كتير للولاد ضمن طيف التوحد يلي عادةً بيلاقوا صعوبة بالتعبير عن مشاعرن!

ابتكرته شركة Sunnymoon، استوديو رسوم متحركة بقيادة نسائية بلبنان. MoodiMe جذاب ومليان ألوان، وبيسهّل على الأهل يعلموا ولادن الذكاء العاطفي بطريقة مسلّية.

هالتطبيق معمول ليصير جزء من روتينكن اليومي، مش بس شي بياخد مساحة على التليفون وبيستعملوه وقت الزهق. MoodiMe بشجّع على المتابعة اليومية، وبيساعد الولاد يبنوا عادة ثابتة للتعرّف على مشاعرن والتعبير عنها.

بتقدروا تنزلوه هون على أندرويد و iOS.

بس إذا عم تدوروا على لعبة مسلية بغرافيكس روعة، شخصيات جذابة وقصة بتشد ولادكن، Sweet Stacks، لعبة ترتيب الحلويات الممتعة من ابتكار نفس الاستوديو، خيار مننصحكن تجربوا.

بتقدروا تنزلوه هون ع أندرويد و iOS.

2. Weynon

Weynon هو تطبيق لبناني بسيط هدفه يسهّل الضهرات العفوية بلبنان. المستخدمين فيهن ينزلوا الضهرة مع صورة أو فيديو قصير، يختاروا الأصحاب اللي بدّن يعزموهن، ويحددوا تايمر. إذا أصحابكن فاضيين، بيقدروا يجوا. وإذا لأ، بيلحقوا المشوار الجاي. هو حل عملي لحتى تنظموا ضهراتكن عالسريع من دون كل وجعة الراس اللي بتصير عادة.

هالتطبيق متوفر للتنزيل على iOS وAndroid.

3. ACTC PT

التطبيق بيخلّيكن تتابعوا حركة باصات النقل المشترك مباشرة، يعني بتشوفوا وين صار الباص عالخريطة لحظة بلحظتها. وكمان بيعطيكن اقتراحات ذكية للمسارات المتوفرة، حتى بيساعدكن توصلوا بأسرع وأريح طريقة لوجهتكن.

وبيضم كمان كل المعلومات عن المواقف والخطوط، مع جداول الأوقات، لحتى يكون عندكن كل التفاصيل اللي بتحتاجوها بكبسة وحدة.

هالتطبيق متوفر للتنزيل من Google Play وApp Store.

4. HEYA RIDE

HEYA RIDE هو أول تطبيق تاكسي بلبنان مخصّص بس للنساء، بيربط الراكبات بالسائقات. بيأمّن خيار نقل آمن ومريح أكتر للنساء، وبيعالج مشكلة التحرش، وبيعطي تجربة تنقّل بتمكّن المرأة أكتر.

حابي تسوقي مع Heya Ride؟ نزلي تطبيق السائقة من هون. بدك توصيلة؟ نزلي تطبيق الراكبة من هون

التطبيقات متوفرة على iOS وAndroid.

5. GoPark

GoPark هو تطبيق لبناني بيسمح للمستخدمين يحجزوا مسبقاً مواقف سياراتن بقلب مواقف خاصة. هدفه يخفّف من وجعة الراس يلي بتصير كل مرة منحاول نلاقي موقف للسيارة، خصوصًا ببيروت. بيأمّن حل مريح وسريع، هيك بتضمنوا موقف قبل ما توصلوا عالمنطقة.

التطبيق متوفر للتنزيل على iOS و Android. 

6. Last Bite

LastBite هو النسخة اللبنانية من مبادرة “Too Good To Go” العالمية، وبيقدّم وجبات مطاعم ما انباعت بعد بأسعار مخفّضة لتقليل هدر الأكل. فيكن تشتروا الأكل الزايد عن المطاعم، الكافيهات والسوبرماركت، وتستمتعوا بوجبات طيبة وبأسعار أقل، وكل هالشي كمان بيساهم بدعم الاستدامة.

التطبيق متوفر للتنزيل على iOS و Android. 

MORE LIKE THIS

هيدا أطيب محل دونر تركي بكل لبنان!