قبل ما تركب تاكسي من المطار… تعرّف على الأسعار الرسمية!
إذا كنت نازل ع المطار بيروت الدولي، ما بقى في داعي تضيع بأسعار التاكسي. أصدرت وزارة الأشغال العامة والنقل لائحة رسمية بتحدّد تعرفة أو الأسعار للنقل أو تاكسي من المطار لمختلف المناطق اللبنانية، بهدف تنظيم الخدمة وضمان شفافية أكبر بالأسعار.
للرحلات من المطار لبيروت وضواحيها، السعر الرسمي بيبلش من 18$ خلال ساعات النهار (06:00 الصبح – 10:00 المسا) و22$ بين 10:00 المسا و06:00 الصبح.
اللائحة كمان بتتضمّن أسعار النقل لمناطق بكل لبنان، من طرابلس والبترون بالشمال لصور والنبطية وبنت جبيل بالجنوب، وكمان مناطق رئيسية بجبل لبنان والبقاع.
مثال على الأسعار:
- جونية: $27 نهارًا / $31 ليلًا
- جبيل: $43 نهارًا / $47 ليلًا
- طرابلس: $80 نهارًا / $87 ليلًا
- صور: $76 نهارًا / $84 ليلًا
- صيدا: $49 نهارًا / $54 ليلًا
- بعلبك: $86 نهارًا / $94 ليلًا
- برمانا: $27 نهارًا / $31 ليلًا
بحسب اللائحة، الأسعار ممكن تختلف شوي بحسب طلبات الراكب، أو إذا تغيّر المسار، أو صار في وقت نطرة إضافي. بس المسافرين لازم يعتمدوا هالأسعار كمرجع أساسي لما ينظموا مواصلاتهن من المطار. مثلًا، أجار النطرة محسوب بـ 4$ بالساعة.
مع إنو كتير من الركّاب بيستعملوا تطبيقات النقل أو بيحجزوا مواصلات مسبقًا، الأسعار الرسمية بتساعد الزوّار يتجنّبوا اللخبطة وأي رسوم أو أسعار مفاجئة بعد ما يوصلوا على لبنان.
إذا رايح على مطار بيروت قريباً، من المفيد تطّلع على اللائحة الرسمية للأسعار للوزارة هون قبل السفر. شوية تحضير ممكن توفّر عليك وقت ومصاري.
للإبلاغ عن أي مخالفة بهالأسعار للقوى الأمنية السياحية، فيكن تتواصلوا معهن على الرقم 493 629 01.
