شط ببلاش وبحر نضيف…اكتشفوا شط طبرجا العام!
إذا بعدكن ما زرتوا شط طبرجا العام، يمكن هيدي تكون الإشارة اللي ناطرينها. صار من أحلى الوجهات البحرية بلبنان لكل حدا بدّو نهار بحر مرتب، مريح، ومن دون أي كلفة. الشط مجاني وتحت إدارة بلدية طبرجا – كفرياسين، وبيوفّر للزوّار بحر نضيف، أجواء عائلية وآمنة، وخدمات بتخلّي الزيارة مريحة من أول النهار لآخره.
من أوّل ما توصلوا، بتحسّوا بالفرق. البحر صافي، المكان مرتب ونظيف، وفي مساحات واسعة للسباحة والاسترخاء، سواء جايين مع العيلة أو مع الأصحاب.
وإذا كنتوا من محبّي المغامرة، ما تفوّتوا فرصة استكشاف عالم طبرجا تحت المي. الغوص هون تجربة مميّزة بين الصخور والحياة البحرية والمناظر اللي بتخطف الأنفاس.
أما لعشّاق النشاطات البحرية، فطلعة كاياك وقت الغروب من أجمل التجارب اللي فيكن تعيشوها. ألوان السما والبحر بهالوقت بتعمل مشهد ما بينتسى، وكل زاوية بتستحق صورة.
وإذا حسّيتوا بالجوع، في أكتر من خيار للترويقة أو الغدا. وما في أطيب من سندويشة سمك بزري كريسبي مع شوية حامض، ونسمة بحر مالحة وإطلالة مباشرة على الموج. لقمة بسيطة، بس بطعم الصيف. وطبعاً، فيكن كمان تجيبوا أكلكم معكن وتقضّوا نهاركن على راحتكن.
ولحتى يضلّ الشط مرتب وآمن للكل، في شوية قوانين ضروري الالتزام فيها:
- المحافظة على نظافة الشط
- عدم إدخال المواد الزجاجية
- ممنوع الموسيقى الصاخبة
- يمنع إدخال الكلاب
- يمنع إشعال النيران أو الشوي
- الالتزام بملابس السباحة
🕗 الدوام: من الساعة 8:00 الصبح لغاية 7:00 المسا
📞 للطوارئ (شرطة البلدية): 573 850 09 – 615 365 81
إذا عم تفتّشوا على وجهة صيفية حلوة، ونضيفة، ومناسبة لكل أفراد العيلة، شط طبرجا العام ناطركن لتقضّوا نهار ما بينتسى ع البحر.
