ما تفوتوا مهرجان الصيف بدير القمر هالويك-اند!
دير القمر عم تستعدّ تستقبل واحد من أحلى مهرجانات الصيف هالسنة مع Fête de la Musique، يلي رح ينعمل من 19 لـ21 حزيران بقلب هالضيعة التراثية الساحرة.
على مدى 3 أيام، رح تعيشوا أجواء استثنائية بتجمع بين الموسيقى، الأكل الطيّب، التسوّق والترفيه للكل. من الساعة 4 بعد الضهر ولنص الليل، رح تتحوّل شوارع دير القمر لوجهة فرح وحياة! مليانة موسيقى، نشاطات وأجواء صيفية ما بتنتسى.
أكتر من 40 عارض محلي رح يشاركوا بسوق مميّز. رح يضم مأكولات و مشروبات متنوعة، منتجات حرفية وفنية بتعكس الإبداع وروح المنطقة.
ومحبّي الموسيقى على موعد مع سهرات وعروض لايف مميّزة، بتشارك فيها فرق موسيقية وفنانين بيخلقوا أجواء حماسية ومليانة طاقة. ومن أبرز محطات المهرجان، عرض الأخوان شحادي نهار السبت، يلي متوقّع يستقطب عدد كبير من الزوّار بأجواء مليانة فرح وحيوية.
أما الولاد، فإلن حصّة كبيرة من المرح مع ألعاب ونشاطات وتجارب تفاعلية مصمّمة خصيصاً لإلن. ونهار الأحد، رح تنعرض مسرحية تفاعلية مجانية للولاد.
وكمان، رح تكون في جولات سياحية منظّمة بين أحياء دير القمر و شوارعها التراثية. ليتعرّف الزوّار أكتر على تاريخ البلدة العريق و معالمها المميّزة، و يستمتعوا بجمال الحجر القديم و الأجواء الأصيلة يلي بتميّز منطقة الشوف.
أما بالنسبة للدخولية، فسعر البطاقة للكبار 300 ألف ليرة لبنانية، بينما الدخول مجاني للولاد.
المهرجان من تنظيم Tribe بالتعاون مع بلدية دير القمر، بهدف دعم الحركة السياحية و الثقافية بالمنطقة وتقديم تجربة صيفية مميزة.
إذا عم تفتّشوا على سهرة حلوة، نهار عائلي مميّز، أو فرصة تستمتعوا بالموسيقى و تكتشفوا سحر دير القمر، ما تفوّتوا Fête de la Musique، وخليكن جزء من هالتجربة الصيفية المميّزة بقلب وحدة من أجمل ضيع لبنان.
