صار في سوق بلدي كل سبت بساحة حراجل (الدخول مجاني)

هيدا السبت وكل سبت، موعدكن مع سوق “يا عيني عَ حراجل” بساحة حراجل – كسروان. إذا بتحبّوا المنتجات البلدية الطازة، الأجواء العائلية الحلوة، وبدكن تدعموا المزارعين والحرفيين اللبنانيين، هيدا السوق لازم يكون على برنامجكن.

سوق “يا عيني عَ حراجل” هو مساحة بتجمع أهل الأرض والمنتجين والحرفيين ليقدّموا أطيب خيرات لبنان، من إيديهن لإيديكن. هون بتلاقوا منتجات بلدية موسمية معمولة بحبّ وشغف، وبتتعرفوا على القصص والوجوه اللي ورا كل منتج.

شو بتلاقوا؟ الخضرة وفواكه الطازة، للمونة اللبنانية الأصيلة، والعسل ومشتقات النحل. كمان الألبان و الأجبان، والزيت، وأكل تقليدي و مخبوزات، و حلويات بيتية، والنبيذ والعرق، وصولًا للصابون الطبيعي، الحرف اليدوية، النباتات والشتل… كل زاوية بالسوق بتحمل نكهة لبنان وهويته، وجودة نابعة من خبرة منتجين ومحبتن للأرض.

ليش تزوروا سوق “يا عيني عَ حراجل” كل سبت؟

لأنها فرصة تلتقوا مباشرةً بالمزارع والحرفي وتدعموا العيلة المنتجة، وبنفس الوقت تساهموا بالحفاظ على تراثنا وتشجيع الإنتاج اللبناني وتقوية الاقتصاد المحلي.

والسوق مش بس للتسوّق… هو وجهة لكل العيلة!

أجواء مليانة حياة، مع ورش عمل وأنشطة زراعية و ترفيهية مجانية للولاد، ليكتشفوا عالم الزراعة بطريقة ممتعة وتفاعلية، ويعيشوا نهار حلو بين الخيرات والناس.

موعدكن كل سبت من الساعة 3:30 الضهر ل 9 المسا بساحة حراجل، برعاية بلدية حراجل وبالتعاون مع مشروع “يا عيني عَ البلدي”، اللي بينظّم أسواق بعدة مناطق بلبنان وبيدعم المنتجين المحليين بشكل مباشر. إذا كنت مزارع، منتج أو حرفي وبدك تكون جزء من هالتجربة، سجّل على الرقم: 454 511 81.

زوروا سوق “يا عيني عَ حراجل”، اكتشفوا خيرات لبنان، وكونوا جزء من مبادرة بتدعم أهل البلد وإنتاجن.

شوفوا كمان:

11 مطعم مع قعدة جزيرة بقلب لبنان