كل المعاملات بمحل واحد…الوزارة تطلق منصة “دولتي”

أطلقت وزارة التنمية الإدارية بلبنان منصة “دولتي” الرقمية يلي هدفها تعطي مواطنين و شركات إمكانية الوصول المباشر لخدمات حكومية.

تم الإعلان عن المنصة بحفل بمختبر الابتكار السلوكي والتحول الرقمي التابع للوزارة بحضور الوزير الدكتور فادي مكي، وعدد من مسؤولين حكوميين و دبلوماسيين و أساتذة جامعيين.

جزء من خطة إصلاحية أوسع

منصة دولتي داخلة ضمن برنامج إصلاحي أوسع للوزارة، “إعادة إبتكار الحكومة 2030“، اللي بيركز على تحديث الإدارة العامة، تسريع التحول الرقمي، والحد من الفساد. الوزارة بتقول الهدف هو إنهاء الوساطة، توضيح إجراءات يلي كانت دايماً معقّدة أو مش واضحة، وتخلّي الناس تخلّص معاملاتها من دون ما تضطر تروح شخصياً على كذا دائرة.

دولتي كانت قيد التحضير من سنين، كجزء من جهود لبنان الأوسع بالحكومة الإلكترونية من خلال OMSAR، يعني مكتب وزير التنمية الإدراية. هالإطلاق الجديد بيشكّل نسخة مجمّعة وموجّهة للمواطنين.

شو فيك تعمل على منصة دولتي:

المنصة بتجمع خدمات من الوزارات والمؤسسات العامة بمكان واحد وسهل البحث. حالياً، هيدي الخدمات يلي بتشملها المنصة:

شهادات الفنادق وأماكن الإقامة من وزارة السياحة
شهادات المطاعم و نوادي ليلية، كمان من وزارة السياحة
شهادات مكاتب السفر والمرشدين السياحيين
تصاريح استيراد شتول الأشجار المثمرة وأنواع مختلفة من البذور عبر وزارة الزراعة.
تسجيل وإعادة إصدار شهادات المصانع، والعلامات التجارية، والمنتجات.
تسجيل مصانع الأغذية ذات الأصل النباتي.
باقات وحوافز للمستثمرين من خلال إيدال (IDAL).
طلبات المساعدات عبر مجلس الجنوب

شو جاي قريباً على دولتي؟

المنصّة بتقول إنها “عم تضيف تدريجياً النماذج الرسمية والمستندات المطلوبة” مع توسّعها.

في قسمين بيعطوا فكرة عن الخدمات الجاية:

خدمات الإدارة العامة — فيك تفتّش حسب الوزارة (الزراعة، الداخلية والبلديات، الصحة العامة، الاتصالات، وغيرن).
خدمات المؤسسات العامة — فيك تفتّش حسب المؤسسة (متل مصلحة مياه الليطاني، إيدال، ومرافئ صيدا وطرابلس وصور).