بتعرفوا إنو في برج إيفل مخبّى بين جبال لبنان؟

مين كان متوقع يلاقي برج إيفل صغير مخبّى بين جبال لبنان؟ بمجدل العاقورة، في معلم غريب ومميّز بيظهر فجأة وسط الطبيعة، وبيخلّي هالمنطقة تستاهل مشوار خاص كرمال تكتشفوه.

مش كل يوم بتكونوا عم تتمشّوا بين جبال لبنان وبيطلع هيك برج قدّامكن! هيدا بالزبط يلي ناطرکن بمجدل العاقورة، بس هالمعلم الصغير صار جزء مميّز من طبيعة المنطقة وواحد من التفاصيل الغريبة يلي بتشدّ الانتباه.

يعني فيكن بكل بساطة تقولوا للناس إنكن رايحين ع برج إيفل… وتكونوا فعلياً طالعين ع العاقورة!

الطريق اللي بيوصّل لهالمعلم، واللي بيبلغ ارتفاعه حوالي 10 أمتار، بياخدكن برحلة حلوة بين أفقا، مجدل العاقورة ويانوح، وبيخلّيكن تكتشفوا أكتر من مطرح بهالمنطقة. وخلال المشوار، فيكن توقّفوا عند المغاور الطبيعية والشلالات وتستمتعوا بالطبيعة الجبلية يلي بتجنّن.

فإذا كنتوا عم تفتّشوا على مشوار مختلف هالصيف، يمكن برج إيفل بالعاقورة يكون المحطة الغريبة يلي ما كنتوا عارفين إنكن ناطرينها.

خبرونا، رح تزوروا هالبرج الصغير؟

شوفوا كمان:

أحلى قعدة ع ضفاف نهر إبراهيم بـ5 دولار بس!