مهرجان المتّة جايي ع الشوف هالويك-اند (الدخول مجاني)

لكل محبي المتّة، حضّروا حالكن لويك إند بطابع قروي ببريح! بلدية بريح عم ينظّموا «مهرجان المتّة» برعاية Maté 19، بحدث بيجمع الترفيه، الموسيقى، التراث والأنشطة العائلية بمحل واحد.

شو ناطركن ضمن مهرجان المتّة؟

المهرجان رح ينعمل السبت والأحد 29 و30 آب 2026 بضيعة بريح، وبيبلّشمن الساعة 8 المسا. والفعالية هدفها دعم منتجات البلدة وإحياء أجواء التراث القروي، مع برنامج متنوّع للكبار والصغار. والحلو إنو الدخول مجاني!

نهار السبت، رح يكون في عرض للاتحاد اللبناني والعربي للرياضات التقليدية والشعبية برئاسة السيد مارون خليل خليل، إلى جانب DJ وأجواء فنية. وكمان، رح يستضيف المهرجان الساحر والمنتاليست إسماعيل فتوني ليقدّم عرض مليان مفاجآت.

أما الأحد، موعدكن مع «يلا ندبك بالضيعة»، ضمن أجواء بتاخدكن لجوّ الضيعة من خلال الدبكة والموسيقى والعزف وقعدات المتّة المجانية. وبهالليلة، رح يشارك عازف العود والمطرب مكرم مرشد ضمن البرنامج الفني.

وإذا جايين مع الولاد، ما رح يزهقوا! المهرجان محضّر برنامج من الألعاب، من Jeux Gonflables وترامبولين، لـBaby Foot وBoxing، يعني في ترفيه ومرح وتحدّي لكل الأعمار.

خدوا العيلة والرفقة، وروحوا ع بريح لتعيشوا ويك إند مختلف، بين قرعة المتّة، الموسيقى، التراث وأجواء الضيعة.

📅 السبت والأحد 29 و30 آب 2026

📍 حي المطيلة، جنب محطة IPT – بريح، الشوف.

🕗 من 8 المسا

🎟️ الدخول مجاني

شوفوا كمان:

أحلى 10 مهرجانات آخر الصيف حول لبنان