مهرجان دبس الخروب راجع ع المتن هالويك-اند (الدخول مجاني)

إذا بتحبّوا أجواء الضيعة، التراث اللبناني، الموسيقى والأكل البلدي، حضّروا حالكن ب 3 و4 تشرين الأول، لأن مهرجان دبس الخروب السنوي راجع ع القصيبة ليجمع أهل الضيعة والزوار بنهارين مليانين أجواء حلوة، فن وترفيه.

المهرجان بيقدم فرصة لتتعرفوا أكتر على تراث المنطقة ومنتجاتها، وبالأخص دبس الخروب المصنوع بإيدين أهل الضيعة، بالإضافة لمجموعة من المنتجات البلدية، المونة البيتية، والحرف اليدوية. والحلو إنو الدخول مجاني. 

وخلال النهارين، فيكن تتمشّوا بين السوق والكيوسكات، تجرّبوا أكلات مختلفة، وتتعرفوا على منتجات من صنع أهل المنطقة، كل هيدا بأجواء قروية بتشبه القصيبة وأهلها.

شو ناطركن خلال مهرجان دبس الخروب؟

السبت 3 تشرين الأول:

• عرض عود مع إلسا
• عرض رقص Fusion Dance Show
• سهرة فنية مع الفنان جو مسعود

الأحد 4 تشرين الأول:

• أنشطة ترفيهية للولاد مع Tiny Fests
• فعالية رياضية مع HYPE
• سهرة عود مع الفنان فادي القاضي

يعني سواء جايين تكتشفوا أجواء القصيبة وتراثها، تجرّبوا المونة والأكل، أو تقضوا نهار حلو مع العيلة والأصحاب، في كتير فعاليات ممتعة بانتظاركن خلال المهرجان.

شو لازم تعرفوا:

📍 القصيبة – المتن الأعلى | ساحة الكنيسة
📅 السبت 3 والأحد 4 تشرين الأول
🎟️ الدخول مجاني

خدوا العيلة، الرفقة، وتعوا ع القصيبة لتعيشوا نهارين من التراث، الفن والفرحة، وتكتشفوا شو بيخلّي هالضيعة مميزة بأهلها ومنتجاتها وأجوائها.

شوفوا كمان:

أشهر سوبرماركت فرنسية فتحت فرع جديد بالحازمية!