كيف فيكن تدعموا عيل الجنوب عند هالمخبز بالجميزة؟

مخبز Mavia Bakery المعروف بالجميزة عم يضيف لمسة مميّزة على مخبوزاته، من خلال مبادرة فنية لدعم عيل من جنوب لبنان. هالمشروع الاجتماعي اللي وراه سيدات عم ينظّم حملة لجمع التبرّعات. هالشي من خلال بطاقات بريدية وستيكرز عليها رسومات فنية، فيكن تشتروا منها عندن.

المبادرة بتعرض أعمال فنية لـ @thurayyakhldizrk.ink. وكل الأرباح رح تروح مباشرة لعيل جنوبية تهجّرت من شهور أو رجعت ع قراها وعم تبلش من جديد.

رسومات ملوّنة بالألوان المائية

بتضمّ المجموعة رسومات مرسومة ع الإيد بالحبر والألوان المائية. بالإضافة لمجموعة رسومات بأسلوب فن البكسل، مستوحاة من طبيعة جنوب لبنان، وأزهاره، ومواسم حصاده، وقططه. من زهر اللوز والجهنمية والياسمين، للخضرة والمنتجات المحلية، وصولًا لشخصيات قطط صغيرة، كلّها تحوّلت لقطع فنية حلوة بتحتفل بجمال الجنوب.

فيكن تلاقوا بطاقات بريدية عليها رسومات، وستيكرز فردية، و مجموعات ستيكرز قابلة للجمع. كمان بوكسات مفاجآت بتضمّ تشكيلة من الرسومات وفن البكسل. وبتبلّش قيمة التبرّع من 3 دولارات للستيكر الواحد و4 دولارات للبطاقة البريدية، يعني فيكن تشتروا قطعة حلوة وبنفس الوقت تساهموا بقضية بتستاهل الدعم.

وقدرت الحملة تجمع لحدّ هلّق حوالي 4,000 دولار خلال الأشهر الماضية، وعم تتوزّع المبالغ من خلال أشخاص موثوقين على تواصل مباشر مع العيل بالجنوب.

شوي عن Mavia

مخبز Mavia Bakery موجود بالشارع الرئيسي بالجميزة، مقابل GOU، ومعروف بخبزه الطبيعي، ومعجّناته، ووجبات البرانش اللي بيحضّرها باستخدام قمح بلدي مزروع محليًا. وهالمشروع اللي وراه سيدات بيدعم المزارعين المحليين وبيساهم بالحفاظ على أنواع القمح البلدي القديمة.

لما تزوروا Mavia لتجرّبوا مافن البسطرمة والبيض، أو طبق الفخار بالبيض والسجق، أو البيتزا ليلة الجمعة، ما تنسوا تشتروا بطاقة أو ملصق من الرسومات لتدعموا عيل الجنوب!

شويّة فن، ومخبوزات طيّبة، وفرصة تساعدوا فيها!

Mavia بيفتح من التلاتا للسبت، من الساعة 9 الصبح للـ5 بعد الضهر. أمّا الجمعة، البيتزا بتضلّ متوفّرة للساعة 11 بالليل!

شوفوا كمان:

15 مطرح بقلب بيوت تراثية ببيروت