TéléCafé فتح بمحطة تلفريك جونية… شو ناطركن برحلتكن؟

صار فيكن تبلّشوا مشواركن بقلب تلفريك جونية مع فنجان قهوة عند TéléCafé! كافيه جديد فتح بمحطة تلفريك جونية، بمساحة واسعة وتصميم عصري، لتقدروا تقعدوا و تروّقوا ع مشروب بتحبّوه قبل ما تطلعوا أو بعد ما ترجعوا من الرحلة.

تلفريك جونية من أبرز المعالم السياحية بلبنان، وبيقدّم تجربة بتخلّيكن تستمتعوا بإطلالة بتجمع بين البحر والجبال. الرحلة بتاخد حوالي 9 دقايق، مع إطلالة بانورامية ع خليج جونية والساحل. وبس توصلوا ع حريصا، فيكن كمان تزوروا مزار سيدة لبنان و تستمتعوا بالمناظر الحلوة.

أما هلّق، صار في محطة جديدة تضيفوها ع مشواركن! فيكن تمرقوا ع TéléCafé قبل ما تركبوا التلفريك وتاخدوا قهوتكن معكن، أو ترجعوا وتقعدوا شوي بعد الرحلة. وحتى تصميم الكافيه بيعكس هويته، بشعار بيجمع بين شكل تلفريك وفنجان قهوة.

شو بتلاقوا ع المنيو؟

بالنسبة للمشروبات، الخيارات بتتنوّع بين القهوة اللبنانية، الدبل إسبريسو والأمريكانو، والخيارات اللي فيها حليب متل الكابوتشينو واللاتيه والسبانيش لاتيه، سخن أو بارد. وإذا بتحبّوا تجرّبوا شي مختلف، في كمان ماتشا لاتيه، موكا ووايت موكا.

أما إذا عبالكن شي بارد ومنعش، فيكن تختاروا سموذي المانغو باشن، مشروب تروبيكال أو ميلك شيك. عدا عن تشكيلة مميزة من المخبوزات والحلويات.

يعني المرة الجايي اللي بتخطّطوا فيها لرحلة ع تلفريك جونية، صار عندكن محطة تمرقوا عليها لتاخدوا قهوتكن قبل أو بعد المغامرة!

خبرونا، حبيتوا TéléCafé الجديد؟

شوفوا كمان:

هيدي أسعار تذاكر تلفريك جونية الجديدة بلبنان