عرسان جداد احتفلوا بزفافن بجولة على البيسكليت

في أهضم من هيك؟

سبا طبوش وأحمد درباس عرسان جداد ما قدروا يعملوا زفاف تقليدي بسبب الإقفال العام بالبلد.

فلاقوا طريقة مبدعة يقدروا يحتفلوا بزواجن وهوايتن بنفس الوقت، وكانت النتيجة جولة على البيسكليت بشوارع طرابلس مع المعازيم والاهل والاصحاب.

برموا بانحاء المدينة على بيسكليت مزينة وعملوا رياضة واحتفلوا بطريقة مميزة.

وتعليقاً على الموضوع، كتب العريس بوست كتير مهضوم. وبقول في:

“لمّا حلم الطفولة يتحقق بزمن الكورونا 🚴🏼‍♂️🚴🏻‍♀️!

من اكثر من ١٥ سنة و انا الأهل و الأصحاب بقولولي انت آخرتك تتزوج عالبسكلة !
و اجا النهار و التقيت بالشخص لي مجنون اكتر مني و تحمّس للفكرة و اصر نفذها بظل وضع الكورونا.
يلي ما كنا قدرنا نعملو من دون دعم، تشجيع و كتير من الحب من الأهل و الأصحاب !
شكراً من القلب للجميع و منشوفكن ان شاء الله بظروف احسن♥️”

ألف مبروك للعرسان، وانشالله بتشوفوا أحلى ايام سوا!