لقينا ٦ مطاعم بحمانا مع قعدة بتطير العقل

ضيعة حمانا قاعدة بين الجبال العريقة ومكللة بـ “الجوهرة الحمرا” ، يعني ثمرة الكرز الرائعة لي بتشتهر فيها. حمانا من أجمل الضيع، ضيعة اللبنانية تقليدية بتتميز بسحر طبيعتها وينابيعها وكرم وضيافة أهلها وناسها، وحمانا بلدة مشهورة بإنتاج الحرير ومطحنتها بتحكي ألف حكاية وحكاية عن تاريخ منسي على الورق بس محفور بالذاكرة، وبتتميز ببيوتها التقليدية القديمة وأكلها الطيب. من بعد ما خبرناكن عن أجمل المطاعم الموجودة ببرمانا، اليوم رح نكفي على حمانا لنخبركن شوي عن ضيعة الكرز ونستكشف سوا المطاعم الموجودة بأحضان هل جوهرة ونتعرف على مميزات كل محل.

١. تشيري لاين، حمانا

موجود على الشير حد قصر لا مرتين الأثري، بتقعدوا برا بتسمعوا صوت المي وبتاكلوا أطيب أكل. القعدة بهل محل ساحرة فيكن تاكلوا كتير من الأطباق الفرنسية والايطالية الشهية إنتو وعم تسمعوا موسيقى رومانسية. بلشوا وجبتكن بالمقبلات متل الباستا المطبوخة بصلصة البيستو المقدمة مع التوم والنعنع. لوجبتكن الرئيسية ما فيكن ما تدوقوا أشهى معكرونة وبيتزا! إذا عبالكن بيتزا مارغاريتا مع أطيب جبنة من فوق أو كاربونارا كلاسيكية أو باستا مع أربع أنواع جبنة، أو شي جريء متل الستيك او الباستا مع السالمون بالصلصة البيضا مع أعشاب، أكيد رح تستمتعوا بالأكل مع كاسة نبيد وقطعة حلو وجو رومانسي.

الرقم: 588 335 71

٢. شاغور حمانا

مطعم قاعد بالطبيعة الخضرا ومحاط بالشجر وبيتميز بقعدة جبيلية على الأصول. فيكن تستمتعوا بصوت المي والمازة الشهية وتعيشوا أوقات حلوة على التراس مع العيلة والأصحاب لأن القعدة شرحة ومميزة. وفيكن كمان تطلبوا جميع أصناف المازة والمقابلات الباردة والسخنة مع مشاوي وكاسة عرق. بس تخلصوا أكلكن، ما في ألذ من فنجان القهوة مع البرودات الحلوين والحديث الحلو بيقطع الوقت بلا ما تحسوا.

الرقم: 534 544 71

٣. بيت ست الكل

بيت ست الكل قاعد بأوتيل حمانا بلازا وبقدم أطباق عالمية ولبنانية مع لمسة فنية فيا شوية ألوان وحب من أجمل ما يكون. بتوصلوا بتلاقوا المقاعد الملونة ناطرتكن وأكل طيب كتير وبتلقوا نظرة على اللوحات الفنية المعروضة أو بتمسكوا كتاب وبتقروا بشي زاوية من زوايا المطعم وفيكن كمان تلعبوا دق طاولة.

الرقم: 889 076 81

٤. كافي الميدان

بس تنزلوا على ساحة حمانا بتلاقوا هل كافي لي بطل على ساحة حمانا وبيتميز بطابقين مع قعدة على التراس تحت الشبابيك والحيطان الملونة ولقمة خفيفة نضيفة. هون فيكن تاكلوا أكل طيب إنتو وعم تستمتعوا بجو الضيعة.

الرقم: 007 077 03

٥. مطعم Valley View فالي فيو

هل مطعم بتلاقوا بأوتيل Valley View، بيتميز بقعدة مميزة على التراس وبيتمتع بصالة فخمة لكل مناسباتكن. فيكن تطلبوا تقعدوا على الشباك لتتفرجوا على المنظر الحلو لي برد الروح وفيكن كمان تحجزوا بالأوتيل وتقضوا أحلى وقت بأحضان حمانا.

الرقم: 777 531 05

٦َ. كافي أبو ملحم

القعدة بأبو ملحم بالساحة مهضومة كتير ومكنكنة. هل محل عبارة عن كافي زغتور بقدم أكلات سريعة ومشروبات وأطيب فنجان قهوة. بيتميز بالمقاعد لي منلاقيهن ببيت التيتا والجدو بالضيعة بس عند أبو ملحم ملونين بطريقة مهضومة والديكور جبلي وبسيط رح يخلي الحنين للضيعة يدوب بقلبكن وهيك بتحلى الجلسة بساحة الميدان الأثرية وبتعملوا أحلى الذكريات وبتتعلقوا بهل الضيعة الحلوة.

الرقم: 687 946 03

لتعرفوا أكتر عن حمانا، محضريلكن دليل سياحي لإذا حابين تزوروا هل منطقة المميزة: مشوار على ضيعة حمانا: ٢٠ شغلة تعملوها بهالمنطقة.