كيف فيكن تقضوا نهار حلو بضيعة مشمش جبيل؟

اليوم رح نعرفكن على جوهرة مخباية بقلب جبيل، مشوا معنا على ضيعة مشمش، جارة عنايا ولحفد وجربتا وغيرن! هالضيعة بتجمع بين التاريخ العريق، المعالم الأثرية الدينية والنقوش القديمة، الطبيعة الحلوة من أحراش وينابيع مي و مغاوير، والناس الطيبة. كتار بقولو إنو تسمية الضيعة بترجع لشجر المشمش رغم قلة وجوده بالمنطقة، بس كمان ممكن بترجع لكلمة “شمّيس” باللغة السريانية وبتعني البلدة المشمسة. كانت تعرف بالزمان بزراعة التوت وإنتاج الحرير، وحالياً زراعة العنب والتفاح فبتلاقوا معاصر نبيد محلية بالضيعة. خلونا نشوف سوا شو فينا نعمل بهالضيعة الحلوة! 

شو فيكن تعملوا بضيعة مشمش؟ 

1. إبرموا شوارع الضيعة وتفرجوا على البيوت اللبنانية التراثية

وبطريقكن جربوا المناقيش من فرن الضيعة، محلات الحلو، وتعرفوا على أهل المنطقة.  

2. زوروا كنيسة مار ضوميط التاريخية 

الكنيسة الحاليّة انبنت سنة 1841 على أنقاض آثار رومانيّة بعدها موجودة لهلق. 

3. استمتعوا بنشاطات حلوة بطبيعة مشمش 

هالمنطقة فيها شجر معمّر من ميات السنين متل السنديان والعفص والصنوبر، وفيها مساحات خضرة واسعة بقلبها ينابيع وبرك مي. 

فيكن تستكشفوا هالمنطقة الحلوة بمسارات ودروب المشي بالطبيعة. 

4. زوروا The Dancing Bees ودوقوا العسل الطبيعي من مشمش

تعرفوا على هالصناعة المحلية واشتروا عسل طبيعي مميز!

الرقم: 830 816 70

وين فيكن تاكلوا لقمة طيبة بمشمش؟

5. جربوا لقمة طيبة وجو دافي عند Oak Yard

هالمطرح عبارة عن مطعم بيقدم أكل طيب، عندن قعدة دافية جنب الصوبا وتراس بيطل على المنطقة فيه قعدة نار ومراجيح. 

والحلو انو كمان فيكن تقضوا الليلة عندن بجو مكنكن على الآخر. 

الرقم: 355 843 81

وين فيكن تقضوا ليلة بمشمش؟ 

6. قضوا وقت مع العيلة بقلب كوخ خشبي عند Maison Bûche

كوخ كبير ومكنكن ناطركن على قعدة جبلية حلوة وتراس بيطل على مناظر خلابة. 

الرقم: 977 210 81

7. عيشوا لحظات ما بتنتسى بقلب بيت لبناني تراثي عند بيت نون

بيت نون واحد من أجمل بيوت الضيافة التراثية بجبيل. قاعد بأعالي ضيعة مشمش وبيطل على مناظر جبلية وغروب للشمس بياخدوا العقل. عندن قعدات تحت العريشة وبالجنينة بين الورد، وغدوات وبوفيهات على تراس ساحر الجمال. 

عندن غرف مكنكنة ومرتبة، بتلاقوا أكل طيب والجو التراثي المميز والقعدة الرومانسية. 

الرقم: 121 272 03

حبيتوا مشوارنا على مشمش جبيل؟ 

شوفوا كمان، مشوار روعة على غوسطا: ٨ شغلات فيكن تعملوها