مشوار روعة على غوسطا: ٨ شغلات فيكن تعملوها

غوسطا ضيعة ساحرة الجمال بقضاء كسروان، وعندها موقع مميز بيطل على ساحل جونيه. هالبلدة معروفة بالأديرة والكنايس الأثرية، الطبيعة الحرجية، والرياضات الحلوة. بترجع تسمية هالضيعة لكلمة “أوغوستا” اليونانية، وبتعني الكبر والعظمة وممكن هالتسمية لأنو موقعها الجغرافي على قمم عالية وعظيمة. اليوم قررنا نطلع على غوسطا لنشوف شو فينا نعمل وشو هي التجارب المميزة بالمنطقة. 

شو أحلى المطارح والتجارب بضيعة غوسطا؟ 

1. إطلعوا على جبل الرحمة وزوروا أجمل المواقع الدينية السياحية

من هالمطل بتشوفوا أجمل اللقطات لساحل جونيه، مناظر خلابة للوديان المنحدرة والأحراش عم تلتقي مع منظر البحر. 

2. زوروا مدرسة عين ورقة الأثرية

هيدي المدرسة من أهم المعالم السياحية والثقافية والتاريخية، كانت عبارة عن دير اسمو دير مار أنطونيوس، بس سنة ال 1789 تم تحويله لمدرسة عين ورقة، وكانت معروفة بلقب “إم المدارس المارونية”. 

3. إبرموا شوارع الضيعة وتفرجوا على البيوت اللبنانية التراثية

بيوت بتتميز بالحجر القديم والقرميد الأحمر، مخباية بين الشجر والحرش. 

4. خدوا أجمل دروب المشي بطبيعة غوسطا الجبلية

غوسطا جوهرة كسروانية قاعدة بين الأحراج المتنوعة، بتلاقوا شجر السنديان والصنوبر والشربين وغيرها. 

5. تفرجوا على أجمل المناظر من فوق عند The Sunland 

هالمطرح مقصد مميز بغوسطا لتشاهدوا غروب الشمس، بتلاقوا بالصيفية قعدة بتاخد العقل.

وبالشتوية عشا رومانسي وقعدة دافية من فوق الجبل. 

وهالمطرح معروف برياضة ال paragliding لما يكون الطقس حلو ومناسب. 

الرقم: 081 001 81 

وين فيكن تاكلوا لقمة طيبة بغوسطا؟ 

6. ميلوا عند La’mouché Restaurant 

هالمطعم المميز عندو قعدة حلوة، أطباق لبنانية شهية ومازة فنية. 

الرقم: 120 964 03 – 930 262 09 

وين فيكن تقضوا ليلة غير شكل بالمنطقة؟ 

7. عيشوا لحظات وليالي مميزة عند بيت بديعة

بيت ضيافة بيتضمن كل وسايل الراحة، عندو جو لطيف، أوض مريحة، قعدة حجر قديمة، مكتبة، قعدة نار، وحتى مسبح. وأحلى شي انو بيطل على ساحل جونيه والجبال بغوسطا. 

الرقم: 949 197 79

8. قضوا ليلة مكنكنة ولطيفة عند Cove 

بيت ضيافة من حجر وبيتميز بجو مودرن ومرتب، عندو قعدة دافية وغرف مريحة. 

وأجمل شي انو عندو منظر خلاب من أعالي الجبل. 

الرقم: 078 278 70 

خبرونا بالتعليقات إذا حبيتوا المشوار على غوسطا كسروان!

شوفوا كمان، كيف فيكن تقضوا نهار مميز بضيعة بكفيا؟