١٦ مطعم شتوي لعشا رومانسي بالجبل

عبالكن تمشرعوها هالشتوية مع الشريك؟ رحنا مشوار على أجمل المناطق الجبلية بلبنان، ولقينالكن ١٦ مطعم شتوي لعشا رومانسي بالجبل، بتلاقوا مطاعم مميزة بيقدموا سفرة على ضو الشموع والموسيقى الكلاسيكية والنبيد اللبناني لتعيشوا أجمل اللحظات وتعملوا ذكريات ما بتنتسى مع حبيبتكن أو حبيبكن هالشتوية. 

1. لولا، بكفيا

لولا مطعم فاخر بيقدملكن أطيب الأطباق الفرنسية والمتوسطية على قعدة حجر رومانسية جنب الشاميني. 

الرقم: 706 062 71

2. Les Caves، فقرا

إستمتعوا بعشا على ضو الشموع و جنب الشاميني بقلب كهف من حجر عند لو كاف، مع كاس نبيد وجبنة فوندو وعيون حبيبكن. 

الرقم: 418 894 03

3. FLINT، ضهر الصوان

فلينت مطعم كلاسيكي على الموديل القديم، بياخدكن على عالم رومانسي مع الشريك من الأكل الدافي وعشا على ضو الشموع ودفى الشاميني.

الرقم: 375 864 71

4. قرطبة، بعبدات

إستمتعوا بعشا راقي مع نبيد، موسيقى البيانو، والعمارة التقليدية عند مطعم قرطبة. عندن قعدة كهف مع شاميني، وأطيب الأطباق اللبنانية والأرمنية على جو جبلي مميز.

الرقم: 705 614 71

5. The Gathering، فقرا

بعد نهار حلو من التزلج مع حبيبكن بأحضان فقرا، فيكن تجربوا هالمطعم المرتب لتختموا نهاركن بعشا رومانسي. إجتمعوا على أكل عالمي وأضوية ساحرة وقعدة رومانسية مع منظر خيالي للجبال البيضا.

الرقم: 612 712 71 

6. بيت الجبل، دير القمر

دير القمر عندها سحرها الخاص بالشتوية، وإذا بتميلوا عند بيت الجبل رح تعيشوا أحلى لحظات بقلب هالجوهرة. هالمطرح بيضم مطعم وبيوت ضيافة جبلية، عندن جو رومانسي من الأحلام!

الرقم: 767 160 71 

7. Les caves roum، جزين

دوقوا نبيد جزين مع قعدة شاميني عند مطعم لو كاف روم! مقصد حلو للعشاق بكل شتوية أول ما تطلعوا على هالمنطقة. 

الرقم: 531 056 70 

8. Le Montagnou، كفردبيان

هالمطعم المرتب بيقدملكن تجربة مميزة للعشاق بالجبل! جبنة فوندو وطبق ستيك مع نبيد وبرود كفردبيان وغمرة الحبيب، يا عين!

الرقم: 441 341 03 

9. La Maison de Forêt، بكاسين

عيشوا بعالمكن الخاص مع الحبيب بين أحضان الصنوبر عند بيت الغابة، عندن مطعم لبناني وقعدة جنب الدفاية مع أكواخ خشب مليانة رومانسية. 

الرقم: 222 800 07 

10. Locanda Corsini، بكفيا

مطعم جبلي بيقدملكن أطباق إيطالية أصيلة مع نفحة من جمال بكفيا وسحر هالمنطقة اللي بتخطف قلوب كل العشاق. 

الرقم: 143 263 81 

11. Iris Domain، بحمدون

بتلاقوا عند هالمطرح تجربة عشا رومانسي بقلب معصرة عنب عتيقة. دوقوا نبيد بحمدون وعيشوا أجمل لحظات بين كروم العنب وعلى موسيقى البيانو. 

الرقم: 879 900 78

12 .Keif Jezzine، جزين

هالمزرعة الجزينية رح تاخدكن مشوار على ريف الجبل! عندن قعدة شتوية مناسبة للعشوات الرومانسية بين الورود المجففة وقعدة قزاز لمحبي الجماليات، عدا عن الأكل الموسمي البيتوتي المميز. 

الرقم: 449 441 70 

13.Bkerzay، بعقلين

التراث والرومانسية إنجمعوا بنفس المطرح عند بكرزاي، مطرح مغمور بالجمال  والأجواء الحلوة بالشتوية! عندن مطعم بمنظر بياخد العقل وبيوت ضيافة إذا عبالكن تقضوا الليلة عندن. 

الرقم: 664 766 71 

14. Le Télégraphe De belle Vue، بحمدون

هالأوتيل والمطعم التراثي قاعد بقلب معصرة عنب قديمة، بيقدم تجربة إستثنائية لمحبي قعدات الرواق الجبلية. عندن عشوات رومانسية ونبيد محلي وجو شتوي مع أطباق مليانة دفى. 

الرقم: 383 628 70 

15. Cherry Lane Hammana، حمّانا

أول ما تتلج الدني، توجهوا على مطعم تشري لاين بحمانا لتجربوا عشا رومانسي مع منظر التلوج. 

الرقم: 588 335 71

16. O Bois، الخنشارة 

هالمطعم قاعد بقلب كوخ خشب ومغمور بشجر الصنوبر.عندو قعدة دافية جنب الحطب وعشا رومانسي من الأحلام. 

الرقم: 752 345 03 

خبرونا بالتعليقات، أي مطعم شتوي لعشا رومانسي بتختاروا من هول؟

شوفوا كمان، ١٥ مطعم شتوي مع قعدة جنب النار بلبنان