ضيعة من البقاع: تعرّفوا على ضيعة طاريا ببعلبك

بالرغم من الأوضاع الصعبة والحرب يلي عم تقطع فيها المنطقة، ضيعنا البقاعية بعدها بتخبّي قصص وجمالات منسية. اليوم رح نحكي عن طاريا، ضيعة بعلبكية فيها تاريخ وطبيعة بيفرجونا صورة من الماضي الجميل، ومهما كانت الظروف، جمالها بيضل حاضر بالذاكرة.

^{Credits: طاريا – ضيعة غربي بعلبك}

موقع مميز وهوا نقي

هالضيعة بتتربع ع السفح الشرقي لجبال لبنان الغربية، وبترتفع 1200 متر عن سطح البحر يلي بيخلي هواها نقي ومناظرها بتاخد العقل. حواليها قرى متل شمسطار والنبي رشادة، وسهل البقاع من الشرق وسلسلة جبال لبنان الغربية من الغرب.

تسمية ضيعة طاريا

تسمية “طاريا” بتخبّي وراها معاني غنية وتاريخ عريق. حسب معجم أسماء المدن والقرى اللبنانية، الكلمة ممكن يكون أصلها من “ثريا”. وبتعبّر عن ارتفاع الضيعة وعلوها، كأنها بتتأمل النجوم من فوق. وفي تفسير تاني بيقول إنو الاسم ممكن يكون جايي من “رياني” أو “طورريا”، إشارة لجمال جبالها وغناها الطبيعي بالمي والينابيع.

^{Credits: طاريا}

كمان بيحكوا إنو “طاريا” ممكن تكون مرتبطة بالرهبان اللي عاشوا بهالمنطقة بزماناتن، و”تورايي” بمعنى نساك أو متعبدين، وكأن الضيعة كانت ملاذ للتأمل والروحانية. شو ما كان أصل التسمية، “طاريا” بتحكي قصة جمال الطبيعة وعبق التاريخ اللي محفور بكل زاوية فيها.

آثار بتحكي عن تاريخ عريق

طاريا مش بس طبيعة خلابة، هيي كمان غنية بالتاريخ. عندكن حوش باي، يلي في مقام النبي نجوم، واللي بينحكى إنو في بركة ما بتنقص ميتها، وكتير ناس بيزوروا كرمال هالمقام. إذا بتحبوا الأسواق، سوق التليلة شمال الضيعة بيجمع ناس من كل المناطق للتسوق والدردشة.

^{Credits: طاريا – ضيعة غربي بعلبك}

أما الآثار، فهي بتكشف عن طبقات الزمن يلي مرقت ع هالضيعة. الرومان تركوا بصمتن بمعبد مصغر عن معبد جوبيتر. المماليك كمان موجودين بآثار المطاحن والمعاصر الحجر، وقلعة الحصن واقفة شاهدة على عصور مختلفة. وما تنسوا قبو حوش باي ومغارة العطشان، معالم بتخبي أسرار كتيرة من التاريخ.

وين فيكن تاكلوا بطاريا؟

مطعم ومنتزه حوش باي هوي المكان المثالي لتجربة الأكل بهالضيعة. الموقع بجانب بركة حوش باي بيخلّي التجربة أروع، مع أجواء رايقة وطبيعة ساحرة. هون، بتجربوا أكلات لبنانية أصيلة، كمان بتعيشوا أجواء الضيافة يلي بتميز المنطقة.

مؤخراً، طاريا عم تواجه ظروف صعبة بسبب الحرب، ومنتمنى يرجع السلام لأرضها ويرجعوا أهلها على بيوتن ويرجعوا يعيشوا بأمان.

عجبكن هيدا المقال عن ضيعة طاريا؟ شوفوا كمان، ضيعة من الجنوب: تعرّفوا على ضيعة كفرحونة