بس لـ 3 أيام… دخول مجاني ع المتاحف والمواقع الأثرية بكل لبنان!

المديرية العامة للآثار بوزارة الثقافة عم تحتفل ب اليوم الوطني للتراث، وبهالمناسبة رح تفتح كل المتاحف والمواقع الأثرية التابعة إلها بكل المناطق اللبنانية قدام الزوّار ببلاش، من دون رسم دخول، أيام الأربعاء والخميس والجمعة بـ14 و15 و16 من أيار، خلال الدوام الرسمي.
هالخطوة بهدف تشجيع الناس يتعرفوا أكتر على تراث لبنان الثقافي، ويكتشفوا جمال تاريخن الغني من جديد.

كتير من المتاحف المميزة رح تكون مفتوحة قدّام الكل ببلاش بهالفترة، فحبّينا نسلّط الضو اليوم ع متحف بيروت الوطني، يلي يعتبر من أهمّ المؤسسات الثقافية بالعاصمة. هالمتحف بيضمّ مجموعة غنية من الكنوز الأثرية والتاريخية، من تماثيل وقطع نادرة وتوابيت وقبور عمرها آلاف السنين، وبيغطي حقبات زمنية كتيرة من الفينيقيين للرومانيين وغيرهم من الحضارات اللي مرقوا ع هالبلد.

وما تنسوا تزوروا باقي المواقع التراثية حول لبنان! من بعلبك مدينة الشمس، آثار صور الفينيقية، بيت الدين، وجبيل يلي تعتبر من أقدم مدن العالم، وغيرها من الآثار اللي مصنّفة ضمن التراث العالمي بالأونيسكو! وهيدا دليلنا ل ٣٠ موقع أثري فيكن تكتشفوهون بلبنان، اكبسوا هون.

أي موقع أو متحف رح تزوروا ب اليوم الوطني للتراث؟

وإذا عبالكن تكتشفوا متاحف بيروت، هيدا دليل ل 14 متحف ببيروت فيكن تزوروهن مجاناً بهيدي الأيام.