بيت جدو بالجنوب صار سينما! شوفوا هون

بقلب النبطية، في بيت جنوبي قديم انكتبت قصتو من جديد، وتحوّل لزاوية ولا أجمل اسمو Filmanzel أو فيلمَنزل. البيت يلي كان مهجور من سنين، صار اليوم مساحة سينمائية وثقافية حيّة بتجمع الناس على حب الأفلام والفن والجنوب.

🎬 من بيت جدو لسينما…

فيلمَنزل مش سينما عادية. هادي بيطار، مخرج لبناني من النبطية، قرر يحوّل بيت جدو التراثي لسينما بتعكس روح الزمن الجميل. من أول ما تفوتوا، بتحسوا بشي مختلف: البلاط العتيق، بوسترات الأفلام الكلاسيكية، وقطع ديكور قديمة بكل زاوية. البيت بعدو محافظ ع موديلو القديم ولمحات من تاريخو الجنوبي. المكان مناسب للتصوير، للقراية، أو لقعدة عفوية مع أصحابكن.

🎞️ غرفة السينما: روح هالمكان

غرفة السينما أكتر زاوية رح تنغرموا فيها! كل فيلم بينعرض هون بيجي مع إحساس مميز. الصوت، الصورة، والجو مهيأين ليقدموا تجربة هادية ومريحة. الأجواء بتخليكن تندمجوا بالفيلم، وكأنكن بقلب القصة. الأفلام من إختياركن، إن كان أفلام قصيرة، أو وثائقية، أو من السينما التجريبية.

الهدف من غرفة السينما مش بس المتعة، بس كمان المشاركة والتفكير سوا! في دايماً نقاشات ولقاءات بتخلي التجربة أغنى، وخاصةً بالفترة الأخيرة لما التركيز عم يكون ع أفلام من وحي الجنوب وتاريخو يلي مش الكل بيعرفوا!

☕ قهوة وأحاديث ما بتخلص!

المكان فيه كافيه كتير لطيف بيقدّم قهوة، شاي، مشروبات باردة، وأرجيلة. بتحسّوا حالكن قاعدين بأوضة قعدة ببيت قديم، مع كراسي خشب، طاولات صغيرة، وإضاءة دافية. الأحاديث ما بتخلص، والجو بيخليكن ما إلكن قلب تقوموا! فيكن تشتغلوا، تلتقوا بحدا، تشاركوا بورشات فنية، أو ببساطة ترتاحوا. الأسعار مقبولة، والأجواء ولا أروع!

Filmanzel مكان بتطلعوا منو حاملين أحلى الذكريات. هو دعوة للناس ليعيشوا السينما والفن بالجنوب. شو ناطرين؟ زوروا اليوم قبل بكرا!

🕰️ أوقات الدوام

Filmanzel بيفتح كل يوم من 11 الصبح لـ11 بالليل. فيكن تزوروا بأي وقت، تحضروا فيلم، أو تمرقوا تاخدوا قهوتكن وتقعدوا شوي. ما تنسوا تابعوا صفحتن هون. 

حبيتوا قصة هيدا بيت جنوبي يلي صار سينما؟ شوفوا كمان، فنانين الجنوب رجعو، هالمعرض فتح من جديد بالنبطية!