طيران MEA رح يطلق شركة طيران منخفضة التكلفة؟ هيدا يلي منعرفوا

بالفترة الأخيرة، كنا عم نشوف أخبار إنو شركة طيران الشرق الأوسط بلبنان MEA بدها تطلق شركة طيران منخفضة التكلفة Low Cost، وكان في كتير شائعات عم يتم تداولها على السوشيال ميديا. لفترة ما كان في جواب واضح إذا أو إمتى رح يصير هالشي. بس لهلق، هيدا يلي منعرفوا خطط الـMEA لهيدا الموضوع.

MEA عم تشتغل ع هالمشروع من زمان…

رئيس مجلس إدارة الـMEA محمد الحوت كشف إنو الشركة صارلها تقريبًا 10 سنين عم تدرس إطلاق شركة طيران مستقلة ومنخفضة التكلفة تحت مجموعة الـMEA. بس المشروع كان دايمًا يتأجّل بسبب أوضاع السوق وعدم توفّر الطيارات. والأزمة الاقتصادية وكورونا كمان كانوا من أسباب التأخير.

إيمتى رح ينطلق؟

وضّح الحوت إنو الشركة كانت عم تراقب الطلب ع الرحلات الرخيصة. وكانوا عم يدرسوا أسواق متل ألمانيا، الدنمارك ومصر.

بس المشكلة الكبيرة كانت تأمين الطيارات، خاصةً مع مشاكل سلاسل التوريد عالمياً وتأخير التصنيع اللي مأثّر على كتير شركات طيران. الـMEA نفسها ناطرة توصيل طيارات جديدة من إيرباص، متل الـA321 XLR والـA330 Neo، اللي مفروض يوصلوا خلال السنين الجاية.

هلق، الـMEA رجعت فتحت ملف المشروع لتعيد تقييمه وتحدّث الخطة الأصلية. الهدف إنو يبلّشوا الشركة بأربع لخمس طيارات. الحوت قال إنو النموذج الأولي للأعمال اللي انعمل من حوالي عشر سنين، صار بدّو تحديث. هالشي ليتناسب مع وضع السوق الحالي، طلب الركاب، وارتفاع تكاليف التشغيل.

وأكّد إنن حالياً عم يعيدوا دراسة الأرقام المالية وعم يجرّبوا يشوفوا توفّر الطيارات، خاصةً مع المشاكل اللي بعدها مستمرة عالمياً بتسليم الطيارات.

مع إنو ما في تاريخ محدد للانطلاق بعد، التركيز الجديد ع هالمشروع بيدل إنو الـMEA صارت جدّية أكتر من أي وقت مضى لتخلّي شركة الطيران الرخيصة حقيقة.

شوفوا كمان، هيدي أسعار تذاكر الطيران ع بيروت لصيف 2025!