عندكن نطرة بالمستشفى؟ هالمبادرة عم تسهلها عليكن!

غرف الانتظار بالمستشفيات عادة بتكون مليانة قلق، توتر، ونطرة طويلة. مبادرة القراءة أيضاً علاج أو Reading Remedy غير الربحية بتشوف هاللحظات بطريقة مختلفة، وبتقدّم الكتب المجانية كعلاج للمرضى والزوار من قلب غرفة الإنتظار.

هالمبادرة عملوها أشخاص شغوفين بالكتب (وكمان بيشتغلوا بالرعاية الصحية)، وبتجمع بين حب الأدب وفهم عميق للتوتر والقلق اللي بيعيشه الناس بالمستشفيات.

لما تتعبّى غرف الانتظار برفوف من الكتب، هون Reading Remedy مش بس عم تقدّم تسلية، كمان بتوفّر لحظات هدوء، نشاط ذهني، وراحة بسيطة، وبتذكّر الكل إنو القراية ممكن تكون شكل هادي من العلاج.

لهلق، تم افتتاح مكتبات صغيرة بمستشفى ميديكال 2000 بالشويفات ومستشفى سان جورج بالحدث. كل كتاب تم التبرع فيه من قبل محبّ للكتب، والمجموعة بتضم قصص أطفال، موسوعات، بالإضافة للكلاسيكيات الإنكليزية والأدب العربي.

القراءة أيضاً علاج بتأمل تتوسع لعدد أكبر من المستشفيات بالأشهر الجاية!

بدكن تتبرعوا بكتب من مجموعتكن الشخصية؟ فيكن تتواصلوا معن 544 450 76. ولأي شي جديد، تأكدوا تنضموا للمجموعة على فيسبوك.

حبيتوا هالمقال؟ شوفوا كمان:

٩ زوايا ساحرة لعشّاق الكتب والقهوة بلبنان

لازم تكون ع ليستة مشاويركن الجاية! 📚☕