بعيد ميلاد فيروز…أسبوع كامل من أفلامها بهالسينما بالجنوب

بمناسبة عيد ميلاد السيدة فيروز، فيلمنزل عامل أسبوع كامل مخصّص لأفلامها بجنوب لبنان… سبعة أيام من السحر، النوستالجيا، وصوت فيروز يلي بيرجع يملي المكان.

أسبوع فيروز: رحلة بين الصورة و الصوت و الذاكرة

فيلمنزل مش مجرّد سينما! هو بيت جنوبي قديم كان مهجور، وانكتب له عمر جديد. اليوم صار مساحة بتنشر ثقافة، وفن، وحكايات. أول ما تفوتوا، بتشدّكن التفاصيل: البلاط العتيق، بوسترات الأفلام، اللمسات التراثية، وكل زاوية بتحسسكن إنّو البيت حافظ قصص الناس اللي مرقوا فيه. أمّا غرفة السينما… عالم بحد ذاتو!

شو ناطركن بالنبطية؟

وخلال أسبوع أفلام فيروز، هالغرفة رح تتحوّل لزاوية دافية: موسيقى فيروز، صورها، قصص أفلامها، وألوان بتذكّركن بزمن ما بينتسى. التجربة بتصير أقرب للقلب… وكأنّها جلسة مع فيروز بقلب المشهد.

العروض ما بتوقّف: أفلامها، مسرحياتها، وأغانيها صبح وعشية، لتعيشوا أرشيف كامل كلّو حنين. وبعد كل عرض، في دردشات بسيطة بتجمع الحضور، نقاش عن أثر فيروز بالسينما، بذاكرة اللبنانيين، وبحياة كل واحد منّا.

هالأسبوع هو دعوة نرجع نتذكّر، نشارك، ونغنّي لعيد ميلاد الأسطورة اللي ما بتتكرر: فيروز.

إذا بتحبّوا فيروز، أو بكل بساطة بتحبّوا السينما القديمة، فيلمنزل هو المحل. أسبوع ساحر ما بينعاش إلا هونيك!

📍 العنوان

النبطية التحتا، مقابل المدرسة الإنجيلية

اكبسوا هون لموقع المحل بالزبط

⏰ الدوام

كل يوم من الساعة 11 الصبح حتى 11 بالليل

📞 للتواصل

الرقم: 344 791 76