مطعم بالمدينة عندو منظر جبلي، تعرفوا ع هالمحل!
حضّروا حالكن لتجربة بتجمع بين أطيب النكهات اللبنانية وأروع إطلالة بتاخدكن بعيد عن ضجّة المدينة لعزّ الطبيعة. خلّونا نعرّفكن على Le Mashwa بالمنصورية، المطعم يلي بيقدّملكن أجمل المناظر الجبلية من نص المدينة.
أحلى شي عند Le Mashwa هو التراس الساحر المطلّ على الجبال والمساحات الخضرا. قعدة بتردّ الروح، تحتكن الشجر والطبيعة، وفوقكن السما الزرقا، بجو منعش بينسيكن كل همومكن. تخيّلوا إنو بس 10 دقايق من بيروت، وبتحسّوا حالكن بمحل تاني كلياً.
أما الأكل، فهون القصة غير! من أطيب المشاوي على أصولها خاصةً لحم الغنم، للمازة اللبنانية الغنية يلي بتنزل بالفخارة، واللحمة النية الطازة، وصولاً لأطباق يومية بتفتح النفس. وما فيكن تزوروا المكان بلا ما تجرّبوا ورق عنب بالكرز، فتّة الصفيحة، ورقاقات السجق، وأكيد الحلويات يلي بتكمّل هالتجربة المميزة.
ومع غروب الشمس، السحر بيكمل… قعدة التراس، نسمات الهوا العليلة، وأضوية المدينة من بعيد بيخلقوا أجواء رومنسية وهادية ما بتنتسى.
Le Mashwa هو المكان المثالي للعيل، للأصحاب، أو حتى لعشا مميز. إذا عم تدوّروا ع مطعم بالمدينة بتراس جبلي وأجواء بتجنّن، هيدا هو الخيار الصح.
بتلاقوهن ع طريق مكلّس – المنصورية. فيكن تتابعوهن ع انستغرام هون. للحجز ع الرقم: 270 333 81.
