ما تفوتوا مهرجان الربيع بضيعة قرنايل! (الدخول مجاني)
المتن عم يتحضّر يعيش أجواء ولا أروع مع مهرجان الربيع – قرنايل!
من 28 لـ31 أيار، ومن الساعة 4 بعد الضهر للـ11 بالليل، ساحة الضيعة رح تتحوّل لمكان مليان حياة، ألوان، موسيقى ونشاطات بتجمع الكل… هالمهرجان من تنظيم Tribe Events Management بالتعاون مع بلدية قرنايل، والأحلى؟ الدخول مجاني!
إذا بعدكن عم تدوروا على مشوار حلو لهالويكند، يجمع بين الطبيعة، التسلية والتسوّق، قرنايل ناطرتكن. أكتر من 40 عارض ومشارك رح يكونوا موجودين بسوق متنوّع فيه مأكولات طيبة، حلويات، مونة لبنانية وقرناوية، منتجات حرفية وأشغال يدوية مميزة. فرصة حلوة تكتشفوا منتجات محلية وتدعموا أهل المنطقة.
وكمان في نشاطات وتجارب ممتعة لكل الأعمار. فيكن تزيّنوا المراوح الخاصة فيكن بالألوان واللمسات يلي بتحبوها، وتعيشوا أجواء إبداعية مع العيلة والأصحاب. والولاد إلن حصّة كبيرة من المرح، مع مساحة ألعاب ونشاطات ترفيهية محضّرة خصيصاً ليقضوا أحلى الأوقات.
وأكيد، ما في زيارة ع قرنايل بتكمل من دون مشوار ع بحيرات فالوغا والاستمتاع بالطبيعة الساحرة، الهوا النضيف والمناظر الربيعية يلي بتردّ الروح. المشوار بحد ذاتو تجربة حلوة، خاصةً لعشّاق التصوير والطبيعة.
مهرجان الربيع – قرنايل هو فرصة تعيشوا نهار مختلف، تتعرّفوا على أهل الضيعة وأجوائها، وتخلقوا ذكريات حلوة مع الناس يلي بتحبوها.
📍 ساحة قرنايل
🗓️ 28 – 31 أيار
🎟️ الدخول مجاني
حضّروا حالكن وتعوا عيشوا الربيع متل ما لازم ينعاش، بقلب قرنايل.
