إطلاق باصات كهربائية عامة ع خط بيروت – جبيل!
لبنان أطلق رسميًا أوّل خط باصات كهربائية للنقل المشترك بين المدن، وصار الخط شغّال على الأوتوستراد الساحلي بين بيروت وجبيل.
الخط الجديد بيشتغل عبر 4 باصات كهربائية بالكامل، وبيمرّ على محطّات أساسية متل الجديدة، أنطلياس، جونية، والكاسليك، ليسهّل التنقّل اليومي للناس المتوجّهين شمال بيروت. المشروع كمان ضمّ تطوير عدّة مواقف باصات، ونظام تشغيل رقمي، ومحطّات شحن شغّالة عالطاقة الشمسية بموقف جبيل.
ورغم إنو المشروع أخد وقت وتأجيلات قبل ما ينطلق رسميًا، اليوم صار واقع فعلي على الطرقات. والأهم إنو الباصات مجهّزة لذوي الاحتياجات الخاصة والكراسي المتحرّكة، حتى تكون وسيلة نقل مريحة ومتاحة للكل، كمان الطلاب والموظفين لكبار السن.
ومن وقت إطلاقه بـ2024، نظام باصات النقل المشترك بلبنان عمل تطويرات كبيرة. ومن ضمنها إنو صار موجود عـ Google Transit، وهالشي خلّى كل طرقات ومواعيد الباصات العامة متوفرة عبر Google Maps.
خطوات متل هيدي عم تعطي أمل إنو النقل المشترك بلبنان رح يصير منظّم، عملي، وأسهل أكتر للحياة اليومية. ومنتمنى أكيد نشوف تحسينات أكبر بالبنية التحتية بالفترة الجاية.
جربتوا الباصات الكهربائية الجديدة بلبنان؟ خبرونا كيف كانت تجربتكن!
