بتعرفوا في مهرجان اللافندر بلبنان؟ ما تفوتوا هالويك-اند!

إذا بعدكن عم تفتّشوا على مشوار صيفي مختلف، يجمع بين طبيعة، موسيقى، وأجواء الريفية، ما تفوّتوا مهرجان اللافندر نهار السبت 11 والأحد 12 تموز 2026، بقلب ضيعة كفرمشكي – راشيا.

بعزّ موسم اللافندر، رح تقضّوا نهار مليان هدوء وجمال بين الحقول البنفسجية بأول مزرعة لافندر بكفرمشكي Kfarmishki Lavender ، مع إطلالة ساحرة على جبل الشيخ وأجواء بتردّ الروح. وإذا حابين تمدّدوا الزيارة، في أكواخ خشبية وسط حقول اللافندر، لتعيشوا تجربة مميّزة بين أحضان الطبيعة.

خلال مهرجان اللافندر، في برنامج متنوّع لكل أفراد العيلة. استمتعوا بموسيقى لايف بتجمع بين الأغاني البوب والشرقي، ودوقوا أشهى الصاج، المناقيش، والأكلات البلدية من كيوسكات الأكل بالمهرجان. وما تنسوا تمرقوا على سوق المونة، وتكتشفوا منتجات محلية طازة، أو تتسوّقوا منتجات اللافندر شغل إيد، من زيوت عطرية، وصابون حرفي، وعسل، وغيرها من المنتجات الطبيعية. 

أما للولاد، ففي كتير نشاطات مسلّية، منها ركوب التراكتور بين الحقول، ركوب المهر، جولات مشي بالضيعة للتعرّف على طبيعتها وجمالها، والرسم على الحيطان ضمن أجواء فنية وترفيهية.

هالمهرجان هو أكتر من مجرّد نشاط صيفي… هو احتفال بالمزارعين والحرفيين اللبنانيين، وبكل شخص اختار يكفّي يزرع، وينتج، ويخلق مساحة بتجمع الناس حول الطبيعة، الموسيقى، والتراث اللبناني.

📍 ضيعة كفرمشكي – قضاء راشيا، لبنان

📅 11 و12 تموز 2026

🕚 من الساعة 11 الصبح للـ6 المسا

🎟️ الدخولية: 10$ (ما بتتضمن الأكل والشرب)

📞 للحجز: 492 774 71

خلّوا هالويك إند يكون غير، وخدوا بريك بين ريحة اللافندر، الموسيقى، الأكل الطيب، والطبيعة الخلّابة… وعيشوا تجربة صيفية ما بتنتسى بقلب كفرمشكي.

شوفوا كمان:

أجمل 55 محل تتفرجوا ع غروب الشمس بكل لبنان