أكبر سوق أكل جاية ع فاريا هالويك-اند (الدخول مجاني)

إذا بعدك عم تدوّر على أحلى طلعة هالصيف، حضّر حالك! سوق الأكل جاية على فاريا، ومعو 4 أيّام مليانين أكل طيّب، تسوّق، ألعاب، وترفيه بأحلى أجواء جبلية!

من 23 لغاية 26 تمّوز، أوتوستراد فاريا رح يتحوّل لوجهة صيفية بتجمع كل شي منحبّه. من الساعة 5:00 بعد الضهر ولغاية 12:00 نص الليل، استمتع بأكتر من 50 ستاند أكل و90+ مشارك بين مطاعم، حلويات، مشروبات، وحرفيين ومنتجين لبنانيين.

إذا كنت من عشّاق الأكل، حضّر حالك لرحلة نكهات ما بتخلّص! من البرغر والمشاوي، للمأكولات اللبنانية، الحلويات، الآيس كريم، والمشروبات المنعشة… بكل زاوية في طعمة جديدة وتجربة مميزة.

مش بس أكل! إذا جايي مع العيلة أو مع شلّة الأصحاب، في نشاطات بتناسب الكل. الولاد عندن مساحة مخصّصة مليانة ألعاب وتسالي، والكبار رح يرجعوا يعيشوا أجمل ذكريات الطفولة مع ألعاب الكرماس يلي كلّنا كبرنا عليها. شدّ الحبل، غميضة، الكراسي الموسيقية، الليمبو، كرشك عالي يا خالي، الرسم بالطبشور، “إذا الملك قال”، وتحديات اليويو… ألعاب بتردّنا لأيام كنا نقضيها عالطريق مع ولاد الحي.

وإذا بتحب تدعم الصناعات المحلية، رح تلاقي مجموعة كبيرة من الحرفيين والمنتجين اللبنانيين، مع أشغال يدوية، هدايا، ومنتجات مميّزة بتخلّي البرمة أحلى، وبتجمع بين الأكل والتسوّق بمحل واحد.

أما سحر فاريا… فهو قصة بحد ذاته. نسمة الهوا الباردة، الغروب، الموسيقى، والأجواء الحلوة بيعملوا تجربة صيفية ما بتننتسى.

خبّر أصحابك، تعوا جوعانين، واطلعوا على سوق الأكل – فاريا لتعيشوا وحدة من أحلى تجارب هالصيف.

📍 أوتوستراد فاريا
🗓 من 23 لغاية 26 تمّوز
🕔 يومياً من الساعة 5:00 بعد الضهر لغاية 12:00 نص الليل
🎟 الدخول مجاني

شوفوا كمان:

صار في سوق بلدي كل سبت بساحة حراجل (الدخول مجاني)