قعدة جنينة وبركة ميّ بهيدا الكافيه بالمدينة!

محل مخبّى بين الطبيعة والشجر، بيخلّيكن تحسّوا إنكن تركتوا جو المدينة وفتتوا ع واحة خضرا صغيرة. تعرّفوا ع SeraVie، الكافيه يلي رح تحبّوا كل تفصيل فيه بالنقاش.

من أوّل ما توصلوا، بتستقبلكن المساحات الخضرا من كل مطرح، مع شجر الزيتون والجنينة يلي محاوطين المحل. بس الحلو بـ SeraVie إنّو التجربة مش بس قعدة بكافيه. بالمحل في بركة صغيرة فيها سمك، وكمان أرانب فيكن تقرّبوا منها وتتفاعلوا معها، وتفاصيل بسيطة هيك بتخلّي القعدة مختلفة وألطف.

بيعملوا قهوة مختصة بتناسب محبّي القهوة يلي بيهتمّوا بالنكهة والجودة. وفيكن ترافقوا قهوتكن مع كرواسون طازة، معجّنات وحلويات، أو كوكيز إذا عبالكن شي حلو.

وإذا القهوة مش خياركن الأول، فيكن تجرّبوا الماتشا الخاصة فيهن، أو الـ soft serve يلي بيكون خيار منعش وحلو، خصوصًا بأيام الصيف.

أحلى شي بالمكان إنّكن فيكن تستمتعوا بكل شي وإنتو قاعدين بالجنينة وتحت الشجر، بعيد عن عجقة المدينة وضجيجها. الجو هادي ومريح، والمساحات حواليكن بتخلّيكن تاخدوا وقتكن ع رواق، سواء جايين تقضّوها مع أصحابكن أو بدكن قعدة هادية لحالكن.

خلي قهوتكن الجاية تكون بهيدي الواحة الخضرا!

شوفوا كمان:

بيت ضيعة بيستقبلكن ع أحلى قعدة تحت العريشة بالشوف!