ما تفوتوا مهرجان التفاح – بشري هالويك-اند (الدخول مجاني)

إذا بتحبوا التفاح وكل شي بينعمل من خيرات الأرض، حضّروا حالكن لنهار حلو من قلب بشري مع مهرجان التفاح. هالحدث رح يحتفل بموسم التفاح وبالإنتاج المحلي، ويجمع أهل المنطقة والزوار بأجواء مليانة فرح، تسلية وأكل طيب.

رح ينعمل نهار السبت 5 أيلول 2026 بساحة مار سابا – بشري، من الساعة 3 بعد الضهر للـ8 المسا. رح يكون فرصة حلوة لتمضية نهار مختلف واكتشاف شغل وإنتاج أهل الضيعة. الحلو إنو الدخول مجاني، فبيطلع مشوار خفيف ومهضوم.

وبما إنو التفاح هو ملك المهرجان، رح يكون في فرصة تتعرّفوا على أنواع التفاح بلبنان وتشتروه مباشرةً من المنتجين المحليين. وكمان رح تلاقوا مجموعة من منتجات مصنوعة من التفاح، من المربّى والعصير وغيرها من المنتجات البيتية والمحلية.

كمان، رح يشارك بالمهرجان عدد من أصحاب المشاريع والمؤسسات المحلية، وبينها مؤسسات ومشاريع نسائية جديدة، ليعرضوا منتجاتهن وشغلهن ويكونوا جزء من هالاحتفال السنوي بموسم التفاح.

ومش بس هيك، رح يتخلّل النهار مسابقات وفقرات ترفيهية بتضيف جو حلو ومسلّي، وبتخلي المهرجان مناسب لكل العيلة.

مهرجان التفاح مش بس مناسبة للاحتفال بالموسم، إنما كمان فرصة لدعم المزارعين والمنتجين وأصحاب المشاريع المحلية.

فإذا كنتوا ببشري نهار السبت، مرقوا ع ساحة مار سابا، خدوا جولة بين سلات التفاح والمنتجات المحلية، واكتشفوا شو عم يقدّم أهل بشري من خيرات أرضهن وشغل إيديهن.

📅 السبت 5 أيلول 2026
🕒 من الـ3 بعد الظهر للـ8 المسا
📍 ساحة مار سابا – بشري

🎟️ الدخول مجاني

شوفوا كمان:

لكل محبّي اللبن اليوناني، هيدا المحل الجديد ببيروت إلكن