بدكن تدرسوا بفرنسا بسنة 2027؟ هيدي خطوات التقديم من لبنان!

بهالفترة من كل سنة، كتير طلاب بيبلّشوا يفتّشوا على اختصاصات وجامعات برّا لبنان. وإذا حلمكن الدراسة بفرنسا للسنة الدراسية 2027-2028، جمعنا كل الخطوات اللي لازم تعرفوها لتسهّل عليكن عملية التقديم من لبنان.

Campus France Liban بتساعد الطلاب بكل مراحل التقديم، من تحضير الملف لحدّ الإجراءات المطلوبة بعدين.

مش عارفين من وين تبلّشوا؟ هيدي كل الخطوات اللي لازم تعرفوها قبل التقديم!

1. اختاروا اختصاص و برنامج أكاديمي بناسبكن

قبل ما تقدموا، خدوا وقتكن لتفتّشوا عن جامعات و اختصاصات بتناسبكن و بتساعدكن تحقّقوا أهدافكن بالمستقبل.

بفرنسا، فيكن تختاروا من اختصاصات كتيرة، متل الفنون، وإدارة الأعمال، و هندسة معمارية، و علوم إنسانية، وغيرها. وفيكن تقدّموا على الإجازة الجامعية، أو تكمّلوا دراستكن، أو تعملوا ماجستير، بحسب المرحلة اللي وصلتولها.

في جامعات بتقدّم برامج بالفرنسي، وجامعات بتقدّم برامج بالإنكليزي، حسب اختصاص والجامعة.
قبل ما تختاروا، تأكّدوا من شروط القبول، ومستوى اللغة المطلوب، و الأقساط الجامعية، وآخر مهلة للتقديم.

2 . قدّم عن طريق منصّة Études en France

إذا كنتوا مقيمين بلبنان وبدكن تدرسوا بفرنسا، منصّة Études en France هي المنصّة الأساسية للتقديم على الجامعات الفرنسية المشاركة فيها.
من خلالها، فيكن تعملوا ملف شخصي للتقديم، و تختاروا جامعات و اختصاصات، وتقدموا المستندات المطلوبة، وتتابعوا طلبكن مع Campus France، وصولًا لمراحل التقديم على فيزا الطالب.

أول شي، لازم تعملوا حساب على الموقع الرسمي:
pastel.diplomatie.gouv.fr/etudesenfrance.

بعدها، بتعبّوا معلومات شخصية و دراسية، و بتقدموا المستندات المطلوبة، وبتنقوا البرامج اللي بدكن تقدّموا عليها.
انتبهوا إنّ خطوات التقديم بتختلف حسب المرحلة الجامعية اللي بدكن تدرسوها، كرمال هيك تأكّدوا إنكن عم تتّبعوا المناسب لإلكن.

3 . انتبهوا لمواعيد التقديم!

بلّش التقديم للعام الدراسي 2027-2028 عبر Campus France Liban بتاريخ 1 تشرين الأول 2026. وآخر مهلة بتختلف حسب البرنامج اللي بدكن تقدّموا عليه.
15 كانون الأول 2026: آخر مهلة للتقديم على السنة الجامعية الأولى ضمن إجراء Demande d’Admission Préalable (DAP)، وكمان على برامج المدارس الوطنية للهندسة المعمارية.

31 كانون الثاني 2027: آخر مهلة للتقديم على السنة التانية والتالتة من الإجازة الجامعية، وبرامج الماجستير، وبعض برامج الهندسة وإدارة الأعمال والفنون اللي بتتبع إجراء hors DAP.

هالمواعيد بتخصّ البرامج اللي بتقدّموا عليها عبر Études en France. في جامعات ومدارس مش مشاركة بالمنصّة، وبتكون عندها مواعيد وخطوات تقديم خاصة فيها، كرمال هيك تأكّدوا من التفاصيل مباشرةً مع المؤسسة اللي اخترتوها.

ونصيحة، ما تتركوا التقديم لآخر لحظة! بحسب Campus France Liban، الطلبات اللي بتوصل بعد آخر مهلة ما رح تنقبل.

4 . حضّروا أوراقكن وتأكدوا من شروط اللغة

لتقدّموا طلبكن، رح تحتاجوا لمجموعة مستندات عن دراستكن وخلفيتكن الأكاديمية. الأوراق المطلوبة بتختلف حسب الاختصاص والجامعة، كرمال هيك راجعوا دليل التقديم الرسمي لتعرفوا شو لازم تحضّروا.

كمان، تأكّدوا من شروط اللغة. إذا البرنامج بالفرنسي أو بالإنكليزي، شوفوا إذا الجامعة بتطلب شهادة لغة معيّنة أو لا.

إذا مطلوب منكن امتحان لغة، حاولوا تحجزوا من بكّير حتى تلحقوا موعد التقديم.

وقبل ما تبعتوا طلبكن، راجعوا الملف منيح وتأكدوا إنّ كل المعلومات والأوراق المطلوبة موجودة.

5. إذا احتجتوا مساعدة، تواصلوا مع Campus France Liban

إذا مش عارفين من وين تبلّشوا، أو أي طريقة تقديم بتناسبكن، Campus France Liban فيها تساعدكن و توجّهكن بالخطوات.

فيكن تستفيدوا من المعلومات و المساعدة ببيروت، وبمناطق تانية بلبنان، وكمان أونلاين. و بتلاقوا على صفحاتن دليل للتقديم وتحديثات عن المواعيد والإجراءات المطلوبة.

بس انتبهوا، إنّ التقديم عبر Campus France ما بيعني إنّكن ضمنتوا القبول بالجامعة أو الحصول على فيزا الطالب. هالأمور بتعتمد على قرار الجامعة والسلطات المعنيّة.

إذا عم تفكّروا تدرسوا بفرنسا بسنة 2027، بلّشوا من هلق فتّشوا عن الاختصاصات اللي بتناسبكن، وحضّروا أوراقكن، وتعرّفوا على خطوات التقديم حتى تكونوا جاهزين قبل آخر مهلة.

لمعلومات الرسمية عن التقديم والمواعيد، زوروا liban.campusfrance.org.

وفيكن كمان تتابعوا Campus France Liban على فيسبوك وإنستغرام لتعرفوا آخر الأخبار عن العام الدراسي 2027-2028.

شوفوا كمان:

6 مناطق، 40+ كاتب وفنان و10 أيام من الكتب… Beyrouth Livres راجع!