كنتوا بتعرفوا إنّو فيكن تستأجروا كتب بلبنان؟

إذا بتحبّوا القراية، أكيد بتعرفوا أديه حلو يكون عندكن مكتبة خاصة مليانة كتب. بس مش ضروري تشتروا كل كتاب بدكن تقروه! فيكن تستأجروا، تقروه ع رواق، وبعدين ترجّعوه. هالخيار مناسب إذا بدكن كتب للبحث، أو حابين تجرّبوا كتاب قبل ما تشتروا نسخة إلكن، أو ببساطة تقروا أكتر من دون ما تصرفوا كتير.

وبما إنّو أسعار الكتب مش دايمًا رخيصة، في مشروع بلبنان بيسمحلكن تستأجروا كتب وتوفّروا مصاري بنفس الوقت!

تعرّفنا على Rent A Book بمعرض بيروت العربي الدولي للكتاب هالسنة، واكتشفنا إنّو هالمشروع موجود من 8 سنين! منال، اللي بتحبّ الكتب والقراية، إجتلها الفكرة لمّا كانت عم تفتّش على مكان تستأجر منّو كتب، واكتشفت إنّو ما في هالخيار.

من هون قرّرت تطلق Rent A Book، لتسهّل عالناس الوصول للكتب وتخلّي القراية بمتناول الكل، لأنّها بتآمن إنّو القراية لازم تكون متاحة للكل، مش بس للّي بيقدروا يشتروا كتب. وفكرة عنجد منحبّها!

كيف فيكن تستأجروا كتب؟

عند Rent A Book أكتر من 200 كتاب أصلي بالعربي والإنكليزي، وفيكن تختاروا الكتب اللي بتحبّوا تقروها. كل اللي عليكن تعملوه هو تبعتولهن ع واتساب عالرقم 828 043 76 وتخبروهن شو الكتب اللي بدكن ياها.

الكتب بتوصلكن لعند باب البيت، وبتدفعوا مبلغ أقل من سعرها الأصلي. وبيكون عندكن من شهر لشهرين لتقرؤوها، بحسب عدد الكتب اللي استأجرتوها. ولمّا تخلّصوا، بيرجع الدليفيري بياخد الكتب من عندكن.

وإذا عندكن أصلًا كومة كتب ناطرين تقروها، وما بقى عندكن مطرح لكتب جديدة، استئجار الكتب ممكن يكون الحل! هيك فيكن تكتشفوا كتب جديدة وتقروا كل شي لفتكن، من دون ما تضطرّوا تشتروا كل كتاب أو تحتاروا وين بدكن تحطّوه بعد ما تخلّصوا منه.

للمزيد من المعلومات، فيك تتواصل معن عبر إنستغرام أو واتساب عالرقم 828 043 76.

شوفوا كمان:

TéléCafé فتح بمحطة تلفريك جونية… شو ناطركن برحلتكن؟