كافيه جديد بالضاحية، بس ديكوره مش متل أي محل تاني!

في أماكن من أوّل ما تفوتوا عليها بتحسّوا إنكن بعالم تاني، و«كافيه عود» هو واحد من هالأماكن! كافيه جديد بحي ماضي – الضاحية، بيجمع بين الديكور المميّز، الألوان الدافية، والأجواء يلي بتخلّيكن تحبّوا تطوّلوا بالقعدة.

أول شي بيلفتكن بـ «عود» هو الديكور الخيالي يلي كل تفصيل فيه إلو سحره الخاص. السجّاد الملوّن والمزخرف، الريش المعلّق، وشجر الزيتون الموجود بنص المحل، بيعطوا المكان طابع مختلف وبيخلّوا كل زاوية فيه مميّزة. حتى القعدات إلها قصّة، مع كراسي على شكل فنجان شاي، دائرية باللون الأبيض مع فرش بني، وفوقها مجسّم إبريق بيكمّل فكرة الديكور.

المراية الكبيرة المحاطة بالسجّاد المزخرف، والأضوية بتصاميمها المميّزة، والنباتات الخضرا، كلّن بيعطوا المكان طابع بيجمع بين اللمسة الكلاسيكية والتصميم العصري. ومع الألوان الدافية والتفاصيل الحلوة، بتحسّوا إنكن بزاوية صغيرة من عالم خيالي، بتنسّيكن شوي ضجّة النهار.

وأكيد، ما في أحلى من قعدة حلوة مع مشروب بتحبّوه! فيكن تمرقوا على «عود» لتبلّشوا نهاركن بقهوة وترويقة، أو تقعدوا مع الرفقات وتستمتعوا بشي حلو مع مشروبكن المفضّل. وإذا كنتوا بحاجة لبريك صغيرة من روتين النهار، أجواء المكان بتشجّعكن تروقوا وتاخدوا وقتكن.

والحلو إنو «عود» بيفتح كل يوم من الساعة 10 الصبح للـ 2 بعد نص الليل، يعني فيكن تزوروه لقهوة الصبح أو لقعدة حلوة بآخر الليل.

📍 العنوان: حي ماضي، مقابل خيمة معوّض، الضاحية الجنوبية لبيروت
🕒 ساعات الدوام: من 10 الصبح للـ 2 بعد نص الليل

📱 فيكن تابعوهن ع انستغرام هون

شوفوا كمان:

وين تجربوا Pumpkin Spice Latte حول لبنان هالخريف؟