١٠ منتوجات غندور أثرت بطفولة كل لبناني

كبرنا وبعدا طعمة منتوجات غندور الأصيلة تحت لسانا. مشوا معنا برحلة لعالمنا الغني بالذكريات نحنا وزغار وتعوا نسترجع أول طعمات لذيذة اكتشفناها واستمتعنا فيا.

١- المحطة الأولى: حشوة الكريمة لي ما في متلا:

من الكلاسيكيات يلي ما بتموت. تم اختراع هالحبة الكربيج بشكلا الحالي سنة ١٩٦٠ وضلت محافظة عن نفسا كأيقونة بين أنواع الشبروقة الكتيرة حتى بعد سنة ٢٠١٠، بعد ما غيرولا إسما وصارت "طربوش". خلوا الحنين يرجعكن للحظة يلي كنتوا تقرمشوا عمهل غلاف الشوكولا الرقيق وترجعوا تغطسوا شفافكن بأطيب كريما طرية متل الغيم. رزق الله عالإيام الحلوة!

٢- المنتج التاني: شبكي إيديكي بإيديي:

من الكلاسيكيات كمان. باكيت الدبكة جزء من مشاهد طفولتنا يلي ما مننساها. طلعوا بسنة الـ ٢٠١٤ طعم جديد عراحة الحلقوم، بس ما قدر ينافس الأول والأصلي بكريمة الليمون المميزة.

٣- المنتج التالت: يمكن لازم نوقف شوي ونتأمل قديش طبقات هالغاتو مقصوصة بعناية.

مع حشوات بنكهات مختلفة وكل وحدي أطيب من التانية، أهلنا كانوا يشترولنا كيك يمامة بالصناديق. هالسناك الخفيف حملنا معنا بالشنطة عالمدرسة طول المرحلة الابتدائية. طلعت منو الشركة عشكل كاب كايك بس ضلت القطعة التقليدية الأولى هي الأساس.

٤- دوبل اللذة بالكراميل:

بيشبه التويكس، ما في دكانة بمدرسة خليت من توفي لاك. الشوكولا المعمول خصوصي لنتقاسموا مع صديقنا المفضل.

٥- خوضوا المغامرة مع سفاري:

مننتقل هلأ لهالوايفير الهش والمغطا بطبقة بتقرمش وشوكولا. مغامرة بالأدغال خاضا كل طفل من عرفوف السوبر ماركت. طعم ما بيتنسا.

٦- وأمرار فيا تكون الإشيا أبسط:

بعدكن بتتذكروا؟ يمكن الشركة وقفت تعمل منو لأن ما قدرنا نلاقي حتى على موقع غندور الرسمي. يا ريت منرجع منشوف منو بالسوق.

٧- خفيف نضيف، والصديق الوفي لحد اليوم:

إذا هالشوكولا ما كان موجود بطفولتكن، يعني لازم تعيدوا النظر بماضيكن من أول وجديد. فقير بالسعرات الحرارية، غني بالطعمة المميزة، أونيكا بعدو لليوم الشوكولا المفضل عند المعجبين الكتار بمنتجات غندور المتنوعة. هوي كمان المنتج الوحيد يلي قدمتو الشركة بعدة أشكال مختلفة: متوفر عشكل ألواح بوزن ١٨ و٢٤ غرام، عشكل أصبعين بغلاف واحد، وباكيت كبير بتحتوي قطع زغيرة. في منو كمان عبندق وكراميل.

٨- تتمتعوا بكل هالطعمات الملونة بدفعة وحدة:

لما بدنا نحكي عن الطعمات المشكلة والحلوة، منقول أكيد: توتي فروتي، هالشوكولا يلي إلو محل بقلوب الكل. كنا نحتمس لنحزر الكدشة شو مخباية، والكدشة يلي بعدا كمان. إنتو أي نكهة بتفضلوا؟

٩- خدلك واحد:

أكيد كنتوا تلخبطوا بينو وبين الكيت – كات. بس من وقتا لهلأ بيك – وان تطور وصار في منو عجوز هند وفستق، بالإضافة للأول لي بيجي عشكل أربع أصابع.

١٠- … ولو قد ما بتلف وبتدور رح ترجع عبسكوت التلت خمسات:

شو محظوظين نحنا بهالإختراع! هوي بدون شك رمز من رموزنا الوطنية.

ترجمة: رنا قاروط