لقينا ١٦ مطعم بجبيل مع منظر بطير العقل

جبيل من أجمل المناطق بلبنان عطول مليانة حياة وجمال وحب وأكل طيب، بتفوح منا ريحة التاريخ، التراث والأكل الطيب. كرمال هيك مشوارنا اليوم رح يكون على مدينة الحرف، مدينة جبيل الغنية بالحضارات والمواقع الأثرية والسياحية لنعملكن جولة على أجمل المطاعم بربوع جبيل وناخدكن على كل زاوية من زوايا جبيل لتنقوا محلكن المفضل وتشوفوا الجواهر المخفية والمطاعم الساحرة.

يلا نروح على جبيل!

١. مالينا

بس تمشوا بالشارع العتيق وتكفوا صوب المينا رح توصلوا على مطعم ساحر حد البحر بيعمل أطيب مأكولات بحرية وأطباق لبنانية مع منظر بياخد العقل على السنسول وقعدة وجنينة زغيرة بيسحروا النظر وبخلوا القلب يدق. إذا رايحين على سوق جبيل العتيق قبل، أكيد قاطعين من حدو ولفتلكن نظركن.

الرقم: 111 544 09

٢. كامي

مطعم سوشي بيتميز بقعدة حجر حلوة كتير ومكنكنة. أول ما تفوتوا على المحل رح تحسوا حالكن بمكان مختلف من ورا الديكور لي بتضفي علي اللمسة اللبنانية من خلال قعدة الحجر. القعدة برا بطول العمر مع الورود والأكل الطيب.

الرقم: 886 944 09

٣. سابوري إي فيني

مين مولع بالأكل الإيطالي؟ سابوري إي فيني مطعم متخصص بالمطبخ الإيطالي وعندو قعدة حلوة كتير والباستا والبيتزا عندو معمولين على الأصول. هل مطعم كمان مناسب لقعدة رومانسية، قعدة الجنينة برا المليانة ألوان وزهور وحب.

الرقم: 333 734 81

٤. هافين ذا كابين

مطعم بياخد العقل معلق على كتف الجبل، الفيو رائع بتشوفوا منو جبيل كلها من فوق، مطرح ما السما قريبة ومطرح ما فيكن تسهروا على ضو القمر تحت النجوم وتتغزلوا ببعض وتعيشوا لحظات ما بتنتسى مع أطيب أكل وفنجان قهوة.

الرقم: 157 576 76

٥. كانتين

مطعم كانتين بيتميز بديكور بيطغي علي الطراز الإيطالي، الألوان لي منلاقيها بالشوارع الإيطالية على البحر مع أضوء خافتة ومصابيح وبرادي مزخرفة. بقدم كانتين أكل لبناني وغربي وحلويات على أنواعها.

الرقم: 777 944 70

٦. أدوناي

مين مشتهي قعدة لبنانية أصيلة؟ أدوناي بقدم أطيب أكل لبناني بالفخارة و أطيب بطاطا مشوية على الحطبة والنار وبجبلكن التاريخ الفينيقي على طبق من فخار. هل محل الموجود بنص السوق العتيق، رح يحسسكن إنكن رحتوا رحلة بالزمن وعم تكتشفوا التراث اللبناني من أول وجديد.

الرقم: 788 236 70

٧. كسار

من أعرق المطاعم الموجودة بجبيل، ولاد المنطقة والغربية بيقصدوا من ورا أكلو الطيب وقعدتو الحلوة. كسار عبارة عن مطعم راقي بقدم صحن يومي ومأكولات غربية ولبنانية، القعدة عندو برا مثالية بين الزهور والأعشاب خرج كل مناسباتكن.

الرقم: 541 541 09

٨. خان جبيل

بس تنزلوا على السوق العتيق رح يستقبلكن هل مطعم اللبناني الأصيل المتخصص بالمطبخ اللبناني وأكلو بطير العقل وبيعمل سهرات عود وقعدات فنية رائعة وعندو أطيب فنجان قهوة على الصبح.

الرقم: 599 544 09

٩. لوكاندا ألا غراندا

مطعم إيطالي بطل على البحر، أول ما تفوتوا علي رح تحسوا حالكن بفيلم رومانسي من ورا الأضواء الخافتة والمصابيح، رح تقعدوا وتاكلوا تحت القناطر الحجر. في كمان قعدة برا قريبة من القلعة من خلالها فيكن تطلوا عمشهد بانورامي رائع لكل المنطقة إنتو وعم تستمتعوا بأطيب لقمة.

الرقم: 333 944 09

١٠. بيت نزهة

بيت نزهة رح ياخدكن رحلة على بيت الضيعة وسطوح البيوت العتيقة مطرح ما ريحة العطر والورد والياسمين بتخليكن تحلموا. هل محل هيك، تراثي بأكلو وديكورو مع لمسة عصرية ومأكولات بلدية مية بالمية. بيت نزهة بيعملوا مونة كمان من البستان وبقدمولكن المي بالبريق القزاز.

الرقم: 057 540 09

١١. ملك البحر

مين بحب البحر وريحة البحر ومنظر البحر؟هل محل إسم على مسمى، رح ياخدكن رحلة على البحر لتحسوا حالكن باليونان. القعدة حجر تقليدية مع كراسي قش وزهور، متخصص بالمأكولات البحرية والقعدة عندو بتعبي الراس والبطن.

الرقم: 559 762 71

١٢. البيلسان

موجود بالقلب النابض للمنطقة بطل على المينا وعندو قعدة كتير مريحة وتراس، محاوط بالشجر والزهور وفي مرجوحة كمان ملفوفة بزهور، مع أطباقو الشهية، هل محل بيستاهل يكون على راس الليستا. بتوصلوا على التراس بتستقبلكن ريحة الزهر وتمثال الآلهة الجبيلية يلي عم تراقب كل المنطقة من فوق ومنظر السفرة اللبنانية التقليدية.

الرقم: 849 949 09

١٣. مون ماكي أموا

إذا كنتو من محبي المطبخ الياباني، هل محل مثالي لأطيب صحن سوشي. بتلاقوا عندو كل أنواع السوشي المعمولين بفن وحب وإتقان في كل الألوان والأحجام والطعمات. بيتميز كمان بتقديم المأكولات البحرية اللذيذة متل السومو المدخن، والشوربات اليبانية الشهيرة بنكهات وأعشاب بتشهي، مع مجموعة من المقبلات المختلفة ومشروبات لذيذة وقعدة بترد الروح.

الرقم: 700 737 09

١٤. باريطاليا

هوي من الكلاسيكيات الإيطالية الموجودة بجبيل، بيعمل أطيب نأكولات إيطالية على الطريقة التقليدية. المكونات عطول طازة، القعدة ولا أجمل، الأكل كتير طيب، رح تحسوا حالكن كأنكن بمطعم بنص إيطاليا. بيسلقوا الباستا بالجرن مع شوية نار لتستوي منيح والبيتزا مشوية منيح مع جبنة شهية وأعشاب طازا، كل الطعمات الإيطالية الطيبة والساحرة موجودة بهل محل.

الرقم: 505 943 09

١٥. البلدي

هل محل موجود بنص السوق العتيق عندو قعدة ولا أجمل وأجواء تراثية ولقمة طيبة كتير، بيعمل ترويقة لبنانية تقليدية: فول، فتة، حمص، مناقيش مع فنجان قهوة بشق النفس وقعدة رومانسية وألوان الربيع والطقس الحلو.

الرقم: 290 882 71

١٦. باب المينا

مطعم تراثي على مينا جبيل بطل على أجمل منظر وقعدة غير شكل وأكلة سمك ومشروب. هل مطعم جار القلعة وبنام على كتف المينا الأثرية ليمنحكن تجربة استثنائية.

الرقم: 475 540 09