أحلى مطعم هالربيع… قعدة جنينة بتنسيكن إنكن بالمدينة!
ما بقى في داعي تتعبوا حالكن وتسوقوا ساعات لتلاقوا قعدة جنينة هادية وقريبة من بيروت. بهالجوهرة المخبّاية بحرش تابت، فيكن تحسّوا إنكن دخلتوا ع حديقة سرّية بنص المدينة.
مع إنو Limonare مش جديد كتير، بس هو مطعم مستوحى من شجر الليمون بإيطاليا. من أول ما تفوتوا عليه، بتحسّوا كأنكن رحتوا ع عالم تاني: مساحة خضرا واسعة، شجر زيتون معمّر، وجوّ هادي بيرتحلو القلب… من الأماكن القليلة اللي بتنسيكن إنكن بعدكن بقلب المدينة.
الأجواء المفتوحة بتخليكن تقعدوا ساعات بلا ما تحسّوا بالوقت، و Limonare بيجمع بين الستايل العصري والراحة بنفس الوقت، مع خضار حواليكن وجو ربيعي لطيف.
شو ع المنيو؟
المنيو إيطالي – متوسطي بطابع عصري، أكلات معروفة بس معمولة بلمسة أرقى من العادة.
فيكن تلاقوا بيتزا على طريقة نابولي، باستا معمولة ع الإيد، ومقبلات متوسطية فيها مكوّنات متل البوراتا، الحبق، الترافل، و الليمون. واضح إنو في اهتمام يكون الطعم غني بس متوازن وخفيف بنفس الوقت.
قسم الباستا هو اللي بيلفت أكتر شي، مع أطباق متل لينغويني سي فود و مافالديني مع فيليه لحم. وكمان في أطباق مميّزة متل gnocchetti مع لحمة، جبنة بيكورينو وبرش ليمون بيعطيها نكهة منعشة. والسمك عندهن قصة تانية، خصوصي الـ Butterfly Seabass المشوي، خفيف، طري، وبيعكس مستوى الأكل الراقي بالمطعم.
مناسب لـ…
المكان مثالي لأيام مشمسة، غدا عائلي، أو ضهرات ويك-إند مع الرفقات قريب من بيروت. كمان حلو كتير لعشا رومانسي تحت إضوية ناعمة بزاوية خضرا هادية.
Limonare مش بس مطعم… هو تجربة كاملة بين الطبيعة، الهدوء، والأكل الطيب. وعنجد من أحلى الأماكن اللي فيكن تهربوا فيها من بيروت من دون ما تطلعوا منها.
📍 العنوان
حرش تابت، قريب من Kaffeine – سن الفيل
⏰ الدوام
يومياً من الساعة 12 الضهر لحد 12 بالليل
📞 للتواصل
الرقم: 444 728 76
ما تنسوا تابعوهن ع انستغرام هون للمزيد.
