١٤ مطعم جبلي ساحر حول لبنان

بعز هل الشوبات بيجي على بالنا إيام نقعد بشي محل بالجبل لنبورد شوي ونشم هوا نضيف بعيد عن ضجة المدينة والعجقة ومنو كمان نستمتع بالأكل الطيب وننسا الدني وهمومها والشغل والمسؤوليات. لهيك قررنا اليوم نجمعلكن ليستا فيها مجموعة مطاعم جبلية ساحرة حول لبنان بتتميز بالمناخ الحلو والقعدة لي بترد الروح لأنكن بتستاهلوا هوايات الجبل الحلوين.

جاهزين؟ يلا نروح جولة على أجمل المطاعم الجبلية بلبنان!

١. فوق الغيم، نبحا-بعلبك

عبالكن قعدة بين الغيم؟ فوق الغيم إسم على مسمى، مطعم رح يخليكن تحسوا حالكن قاعدين بين الغيم بمنطقة نبحا بالبقاع وبطل على أجمل مناظر البلد ب٣٦٠ درجة. بقدم هل محل أكل لبناني غير شكل، متل الحمص، المشاوي والبطاطا حرة. المنظر الرائع، متل كأنو جنة على الأرض. القعده تحت الخيمة تجربه مميزة بحد ذاتها، وإذا عبالكن فيكن تمدوا الشرشف على الأرض وتتلأحوا وتاكلوا الأكل الطيب والهوا عم يلعب بشعراتكن.

الرقم: 999 477 70

٢. فريدة، عجلتون

تأسس هيدا المطعم ببيت تراثي قديم بعجلتون عمرو فوق ال ٢٠٠ سنة ومتل ما عم تشوفوا، العمار قديم بياخد العقل متل كل بيوت لبنان الأثرية. مطعم فريدة بيتميز بقعدة غير شكل، عندن قعدة بقلب البيت وقت الشتا وبالصيف بيفتحوا الجنينة للزوار. ما فينا نخبركن قدي الأكل عند فريدة طيب، أكل لبناني على الأصول من الحمص للفتوش للورق عنب للمشاوي، ضروري تجربوا كل أطباق الميزة اللبنانية.

الرقم: 511 835 71

٣. مطعم صبحي، المروج

هل مطعم عندو قعدة روعة بضيعة المروج، بيتميز بدوكور لبناني جبلي وأكل طيب، من خلالو فيكن تطلوا عمشهد بانورامي رائع لكل المنطقة وتستمتعوا بالبرودات الحلوين.

الرقم: 116 384 03

٤. جلسة العرزال، حراجل

بما إنو نحنا بعز الصيفية، صار لازم نفتش على البرود والقعدة بالجبل. وهول الشغلتين موجودين عند جلسة العرزال مع كتير صفات غير بتخلي يكون أجمل محل لفصل الصيف. قضوا وقت مع أحبابكن على سفرة بلدية: جبنة و لبنة وزعتر ومناقيش وبيض وحمص وأطيب بطاطا مشوية مع فنجان شاي.

الرقم: 883 285 03

٥. زهر الربيع، الزعرور

هل محل عندو قعدة صيفية بترد الروح، بتحسوا حالكن قاعدين بالسما، بتوصلوا بتلاقوا بركة مي وميزة لبنانية غير شكل ناطرتكن، بتقعدوا بتاكلوا لقمة طيبة وبتنسوا هموم الدني.

الرقم: 564 444 70

٦َ. تلة نصر، النعص بكفيا

بمنطقة بكفيا الجبلية الخضرا موجود مطعم تلة نصر، بالصيف فيكن تقعدوا برا وتستمتعوا بالفيو الروعة، بس بالشتا كمان الجو كتير حلو. لتاكلوا هل اللقمة الطيبة، لازم روحوا على بكفيا وتغيروا جو وتستمتعوا بالبرودات الحلوين والجلسة الجبلية.

الرقم: 404 690 71

٧. الأزوردي، اللقلوق

بهل طقس الصيفي ما إلكن غير القعدة على مقاعد خشب بفيّات الشجرات وبصحبة بالورد، ولقمة لبنانية بتفتح النفس، رح تشوفوا الجمال اللبناني الأخضر مغطا الجبال. وما تنسوا تتحلوا بس تخلصوا الأكلات!

الرقم: 868 888 76

٨. الفردوس، إهدن

الفردوس جوهرة إهدن المخفية، عمرو فوق ال50 سنة، بتملكوا عيلة بتدير بالها عضيوفها متل كأكنكن بالبيت. هونيك رح تكتشفوا أطيب كبة مشوية دايقينا بحياتكن، وتاكلوا أطباق لبنانية أصيلة وبس تخلصوا ما تنسوا تشربوا شفة قهوة مع النسمات الحلوين وتخبروا شو في بقلبكن.

الرقم: 444 560 06

٩. كركة الحج، ضهور شوير

هلق رح نروح على ضيعة ضهور الشوير لنميّل على هل مطعم الساحر الجمال لبقدم أكلات بيت بأجواء جبلية وقعدة مهضومة. القعدة حجر رح تذكركن ببيت التيتا والجدو واللقمة اللبلدية بتفوت على القلب.

الرقم: 692 390 04

١٠. لو تيليغراف دو بيل فو Le Télégraphe De Belle-Vue، بحمدون

هلق رح نكفي على بحمدون لنتعرف على هل قعدة المميزة بين فيّات الشجر والنسيم العليل. تخايلوا حالكن قاعدين عم تاكلوا لقمة طيبة وتتأملوا الورود والجبال المجيدة، عنجد القعدة بهل محل بطول العمر.

الرقم: 383 628 70

١١. إيسكلابيو، دوما

هل محل موجود بضيعة دوما المغطاية بالقرميد الأحمر والورد، بس توصلوا على هل محل رح تحسوا حالكن بحلم مش بعلم من ورا الفيو الساحر على الجبل والنسيم العليل لي رح يحلي قعدكتن وياخدكن على عالم الأحلام.

الرقم: 082 520 70

١٢. منير، برمانا

هل محل من دون شك من أجمل المطاعم الجبلية بلبنان، ويعتبر الملجا الأمين من شوبات المدينة، فيكن تستمتعوا ببرودات الجنينة، تاكلوا على التراس وتتفرجوا على المناظر الحلوة وترجعوا تبوردوا تمكن بلقمة فواكي مسقعة.

الرقم: 900 873 04

١٣. مطعم الشالوف، جزين

بس توصلوا على جزين وتشوفوا الشلالات وغابة الصنوبر والبيوت العتيقة، بصير وقت الأكل وعلى الأكيد ما رح تلاقوا أطيب وأحلى من جلسة مطعم الشالوف. رح بقدملكن لقمة طيبة مع منظر بخلي القلب يدق وأكيد مع برودات جزين الحلوين.

الرقم: 774 781 07

١٤. بيت الجبل، دير القمر

رح نختم جولتنا بزيارة على بيت بيعجز الكلام اللبناني عن وصفو، هل بيت بيجمع الحنيّة والقعدة الجبلية الهنية والحب بمحل واحد. هل مطعم موجود بحضن بيت ضيافة مميز بالشوف، بقدم أطيب المأكولات مع قعدة بسيطة، ورد ومنظر على الجبل بطول العمر.

الرقم: 767 160 71