ما بقى تكبّوا زيت القلي…هالمشروع بيشتريه منكن!
بطّل في داعي تكبّوا زيت القلي! أخيرًا، صار في مبادرة لبنانية ذكية بتخلّيكن تتخلّصوا من الزيت المستعمل بطريقة صح، والأحلى من هيك إنو رح يدفعولكن عليه كمان.
شركة M&R Global Services بجبيل، عم تشتغل ع فكرة تحويل الزبالة لقيمة فعلية، وهدفها تشجّع الناس يعيدوا تدوير مش بس قناني بلاستيك، بس كمان مواد متل الزيوت، القزاز، ونفايات منزلية تانية كتير ناس ما بيعرفوا كيف يتخلّصوا منها بطريقة صح.
يعني بدل ما ينكبّ الزيت أو غيره من المواد بطريقة بتضرّ البيئة، البيوت، المطاعم، و الشركات بيقدروا يسلّموه ليتم جمعه وإعادة تدويره بشكل مناسب.
ليه هالشي مهم؟
زيت القلي المستعمل لما ينكبّ بالمجلى، مع الوقت بيبرد وبيقسى، وبيعمل انسداد بالمجرور، يعني مشاكل و تصليحات مكلفة. والأسوأ، إذا وصل لشبكات الصرف الصحي، بيساهم بتلوث المي والتربة، ومشكلته بتصير أصعب تنحلّ.
ومع مشاكل الزبالة بلبنان، حتى الخطوات الصغيرة ببيوتنا بتعمل فرق كبير. يمكن بيت واحد ما يبين تأثيره، بس آلاف البيوت أكيد بيأثروا.
السؤال الأكبر…
شو بيعملوا فيهن؟
مع إنو هيدي المبادرة ما وضّحت بالزبط شو عمليتها، بس في طريقة تدوير معروفة.
بس يتجمّع الزيت المستعمل بعلب مسكّرة، بينشال ع محلات بتمرّقو عبر أنظمة فلترة صناعية. هيدي العملية بتشيل بقايا الأكل، المي، و الشوائب التانية. بعدين بينحط بخزانات ترسيب مسخّنة، محل ما الرواسب الثقيلة بتنزل لتحت والزيت النضيف بيطلع لفوق لعملية إستخراج أسهل.
بالمعامل الكبيرة، الزيت المنضّف بيتحوّل لمنتجات متل الديزل الحيوي. يعني هني عمليًا بيفرزوه، بينضفوه، و بيفككوه ليصير قابل لإعادة الاستخدام كمادة فيول أو مواد صناعية تانية.
بدل ما الزيت يضرّ بيتكن والبيئة، صار فيكن تستفيدوا منه و تساهموا بإعادة تدويره… وحتى تربحوا منه.
للمزيد، شوفوا حسابن ع إنستغرام أو تواصلوا مع M&R Global Services عبر 869 606 03.
