اكتشفوا معنا ٥ مطاعم بالشوف مع قعدة خيالية
الشوف من أجمل المناطق اللبنانية بيتميز بالهدوء والمناظر الطبيعية بين الشجر والغابات والتلال، الجبال والوديان البيضا. من بعد ما طلعنا على شمال وتعرفنا على ٩ مطاعم بشمال لبنان مع قعدة خيالية، اليوم مشوارنا على الشوف لنتعرف على ٥ مطاعم بهل منطقة الساحرة من بلدنا مع قعدة خيالية.
١. الكوارة، كفرقطرا
هل مطعم عبارة عن كوخ بيتميز بقعدة جبلية ساحرة، مع أجمل منظر على الشوف وضيعها. الخضار محاوط المكان كلو بس بالشتوية رح تقعدوا جوا حد النار وتستمتعوا بالمنظر الحلو. لي بميز هل محل إنو الأكل كلو صحي ومن من الأرض ويعتبر vegan أو نباتي بس كمان كتير طيب وبشبع. فيكن كمان تشتروا مونة الجبل من عندن وتاخدوها معكن على بيروت وما تنسوا تسرحوا بأفكاركن بهل كوخ المكنكن.
الرقم: 290 424 03
٢. بيتنا، الباروك
بمنطقة الباروك الجبلية الخضرة قاعد مطعم “بيتنا”، كلو أجواء دافية وحميمة من الموقد بتكملها المأكولات اللبنانية اللذيذة. هل محل بسرعة حيصير بيتكن بالجبل! أول ما توصلوا علي رح تدفوا لأن النار بتدفي القلب والروح، رح تحسوا حالكن فايتين على بيت حجر عتيق ودافي بعيد عن العالم والهموم. قعدة لذيذة ومكنكنة حد الشيميني! استمتعوا بأشهى منيو لبناني بأطباق متل كبة نية بالجرن، فتوش مع دبس الرمان، مشاوي طازة، فتة بتنجان، وغيرن كتير. بس تخلصوا أكل بتحملوا حالكن وبتعملوا مشوار على غابة أرز الباروك وبتتفرجوا على التلجات.
الرقم: 456 841 03
٣. إم بطرس، معاصر الشوف
مطعم إم بطرس قاعد بقلب الفندق، مطرح ما فيكن تقضوا ليلة من العمر، إم. بطرس بحضر لقمة بيتوتية وطبخات لبنانية بقلب بيت تراثي مع قعدة رح تخلي قلبكن يدق. استمتعوا بمختلف الأطباق الشتوية الدافية وعيشوا لحظات من الهدوء والسكينة بقلب هل فندق الساحر.
الرقم: 931 300 81
٤. قهوة السوق، بعقلين
بتتميز قهوة السوق بديكور بحسسكن إنكن بالبيت ومعروفين إنهن بيعملوا أطيب كاسة متة. الفرش بهل محل مريح والألوان هادية والترويقة غير شكل عنجد رح تحسوا حالكن ببيت الضيعة. بتتمتع هل قهوة بملامح تقليدية عن بيوت الحجر القديمة يلي منحبها وبنفس الوقت فيها نفحة موديرن. الأكل كتير طيب متل أكل البيت، لبنة وجبنة بلدية ومربى وسندويشات خفيفة وكروسان وسلطات شهية ومقبلات لذيذة.
الرقم: 618 300 05
٥. مطعم السائح، الباروك
قعدة شتوية دافية وأكل شرقي وغربي ببيت خشبي بقلب غابة أرز الباروك، يعني فيكن تعتبروا حالكن قاعدين بقلب التلجات مع إطلالة بتخلي القلب يدق. جربوا قعدوا على الشباك، تدفوا منيح وتفرجوا على على الجبال والوديان البيضا واستمتعوا بأطباق المازة اللبنانية.
الرقم: 587 240 05
