سمعتوا عن المطعم لي مخبى بين شجر التين والزيتون بالشوف؟

مخبى بضيعة الدبية كنز من كنوز الشوف المخفية، مطعم زغير تحت شجر الزيتون والتين، قصتو بسيطة ومهضومة بتعبر عن شغف الشيف جو بستاني بالطبخ والإبداع بعالم الأكل، مشوا نشوف سوا شو مخبيلنا مطعم بيت سومر.

خلطات الشيف جو بسيطة: المكونات طازة من الجنينة، وكل شي معمول على الإيد، وبكل حبّ وشغف. المطعم بيتميز بالديكور المهضوم والقديم، بيجمع بين قعدة الضيعة الرايقة تحت الشجر وبالجنينة، والأطباق المميزة اللي ما بتلاقوها وين ما كان.

بتكتشفوا المحل وبتجربوا برغر الشيف جو الشهيرة، شكلها بيشهي والتجربة مميزة! بتقعدوا على المرجوحة، بتحسّوا بلفحات الهوا اللطيفة، بتسمعوا العصافير، وبتسرحوا بمنظر الجبال الساحرة بالشوف.

كمان بيقدم بيتزا مميزة على أنواعها، من بيتزا المارجريتا، بيتزا دجاج بالباربكيو، أو المكسيكان… طعمات فريدة وغنية. وإذا عبالكن شي مميز جربوا سندويش الدجاج، محشية بصوص غريبة مع سلطة وبطاطا مقلية مقرمشة ومقدمة بكل فن، منظر وريحة وطعمة بيشهوا.

وحتى بتلاقوا طبق باستا ألفريدو كتير طيب، مازة على طريقة الشيف جو، وللتحلاية بيقدم صاج محشي بالشوكولا ومزين بأشهى المكونات!

وشوفوا بالفيديو لما زرنا المطعم أديه نبسطنا بالجو والأكل:

القعدة ونسة، والجو ساحر، والأكل طيب، والمشوار مميز، من أحلى المطارح لتجربوها مع الشريك أو جمعة رفقة، بس ما تنسوا انو الحجز ضروري على 189 651 03.

خبرونا، عبالكن تجربوا بيت سومر؟

شوفوا كمان، هيك فيكن تقضوا أحلى نهار بمنطقة بعقلين.