تطبيق جديد بيساعدكن تلاقوا حيوانات أليفة للتبني بلبنان

عشاق الحيوانات، في تطبيق جديد فيكن تشوفوا فيه آلاف من الحيوانات الأليفة اللي فيك تتبنوها بلبنان اسمو Furrbud!

فيرباد FurrBud عبارة عن تطبيق جديد للتبني هدفو يأمن بيوت وعيل للحيوانات الأليفة المشردة أو المتروكة. وحتى بيساعدكن بحال ضاع حيوانكن إنكن تلاقوا. المنصة سهلة الإستخدام ومقسمة لقسمين، قسم للتبني وقسم للحيوانات المفقودة.

قسم التبني مليان لوائح من كلاب ويسينات جاهزة للتبني، بتشمل صورن، اسمن، جنسن، عمرن، ووصف بسيط عن شخصية الحيوان. هيدي الشغلات رح تساهم بأن يكون اللقاء مع الحيوان اللي عبالكن تتبنوا أسهل بكتير!

ولما تلاقوا الحيوان اللي حابين تتبنوا، بتبعتوا طلب عبر التطبيق حتى تتواصلوا مع الملجأ أو الجمعية الخاصة بالحيوان اللي بدكن ياه. 

 أما بالنسبة لقسم الحيوانات الأليفة الضايعة، فيكن تبلغوا عن حيوانكن الضايع أو حيوان أليف شفتو بناءاً على موقعكن، وتضيفوا وصف عنو وصور حتى صاحب أو صاحبة الحيوان دغري يلاقوا. وحتى فيكن تضيفوا مكافأة للأشخاص اللي بتلاقي حيوان ضياع.

هالمبادرة الرائعة بتقدر تسهل كتير على محبي الحيوانات اللي عبالن يضيفوا فرد لطيف على عيلتن ويتبنوا حيوان أليف. خاصة انو ظاهرة هجر الحيوانات الأليفة والتخلي عنن وتركن بالشارع زادت بعد الأزمة الإقتصادية بلبنان. مع أنو فيه مبادرات كتير عم تحاول تساعد الحيوانات بلبنان، بس تكلفة رعاية الحيوانات المؤقتة أو fostering صارت عالية كتير، وبيبقى الهدف الأساسي هو التبني.

لتنزلوا تطبيق FurrBud، إكبسوا هون! وما تنسوا تابعون على انستغرامن إذا عبالكن تعرفوا أكتر عن هالمنصة الحلوة.

شوفوا كمان، بالفيديو: ببغاء أدهش آلاف المتابعين لأنو بيحكي لبناني