تعرفوا على أقدم ضيعة بالبترون: من أجمل القرى بلبنان!

شو أجمل من ضيعة لبنانية مخباية بين خضار جبال البترون العالية؟ تعرفوا على ضيعة كفور العربة، بتلاقوها قاعدة فوق الـ 1400 متر عن سطح البحر، وكأنها تاج ع قمة جبل. من فوق، هواها نقي، وهدوءها بريح القلب، بهالضيعة بتنسوا كل هموم المدينة.

الغريب بالقصة هوي الإسم ليش إسمها كفور العربي؟ من هالضيعة جايي عيلة بيت “كفوري” يلي كان أصلن بيت مراد وبس هربوا من الضيعة بسبب جريمة قتل صاروا يخافوا يعرفوهن فسموا حالن بيت “كفوري” نسبةً لضيعتن. وبقولوا إسم العربي إجا بعدين. وشو السبب؟ بتشير الاكتشافات الأثرية إنو منطقة كفور العربة كانت مأهولة بعدد كبير من العيل من زمان. بقولوا إنو أصل إسمها بيرجع للعيل العربية لي نزحت من حوران بسوريا بعد الفتح الإسلامي. والدليل على بقاء هالشي الكنايس والأديرة العديدة المنتشرة بالمنطقة، لتخبر حكايات غنية عن تراثها الديني والثقافي العريق.

^{Credits: Ali Badawi}

شو فيها هالضيعة؟

هالضيعة مش كتير معروفة وآخدة حقها ويمكن كتار مش سامعين فيها، بس للصراحة هي عنجد من أجمل الضيع الخضرا يلي ممكن تشوفوها بحياتكن، فيها غابات صنوبر وأرز بتحيط بكفور العربة من كل الجهات، وبتشكل لوحة مرسومة بألوان الطبيعة الخلابة. وبتلاقوا بالضيعة كمان ينابيع مي عذبة بتسقي كل الحقول الخضرا الموجودة بالمنطقة. فيها كمان كهوف ومحابس مخباية، بعدن لليوم كل سنة عم يكتشفوا فيها شي بمجد الخالق.

^{Credits: Ali Badawi}

شو كمان؟

فيكن تجوا تزوروا الضيعة وتتعرفوا على المعالم التاريخية والدينية يلي بتحكي عن إيام زمان، مش بس الطبيعة اللي بتحلي كفور العربة، فيها كتير معالم تاريخية ودينية كمان:

^{Credits: Ali Badawi}

كنيسة سيدة بصة: كنيسة مارونية قديمة وعريقة من أهم أماكن العبادة بالضيعة

دير سيدة القلعة: دير تاريخي واقف شاهد على عصور الماضي

كنيسة مار سمعان العمودي: كنيسة بتتنفس فيها ريحة الماضي العتيق

كنيسة سيدة المعونات: كنيسة مميزة بهندستها

كنيسة سيدة السقي: كنيسة أرثوذكسية قديمة من أقدم الكنايس بهالمنطقة

شو هني المغامرات يلي فيكن تعملوها بالضيعة؟

يلي بدو يعمل هايكنغ و يكتشف طرقات كفور العربة وطبيعتها الحلوة والعيون المي يلي فيها، في كتير طرقات فينا نمشي فيها بين الخضار والطبيعة الحلوة.

^{Credits: Beauty of Lebanon Nature}

يلي بدو يعيش مغامرة أكبر، فيكن تمارسوا كمان رياضة تسلق الجبال.

وللى بدو في يمارس هواية التخييم، هونيك الغابات هادية وملاذ مثالي للي بيحبوا يبعدوا عن كل شي ويقربوا من الطبيعة.

^{Credits: Beauty of Lebanon Nature}

حتى فيكن تكزدروا بالبيسيكليت لأن طرقات الضيعة بتسمح للي بيركبوا البيسيكليت يستمتعوا بالهوا النقي والمنظر الحلو.

يلا نزور كفور العربة!

شوفوا كمان، ضيعة منسية بالجنوب: هجروها أهلها بلا رجعة!