ملك الروستو فتح فرع جديد بخلدة!
ملك الروستو، من أقدم وأشهر سناكات الضاحية من سنة 1984، رجع وفاجأنا بفرع جديد بخلدة! إذا إنتوا من عشّاق الروستو اللبناني على أصوله، هيدا الخبر لحالو كفيل يحمّسكن، خاصةً إذا صارلكن زمان مشتاقين لهاللقمة الطيبة.
بهالظروف الصعبة، دعم المطاعم المحلية صار أهم من أي وقت، وملك الروستو من الأماكن يلي عنجد بيستاهل، لأنو بعدو محافظ على نفس الطعم، نفس الجودة، ونفس الروح يلي حبيناها من سنين.
وإذا بعدكن ما جرّبتو، حضّروا حالكن: المنيو بتفتح النفس! من ألذ لحمة روستو ممكن تدوقوها، للروستو مع جبنة لعشّاق الدسم، كمان الطاووق، الشاورما، السجق والمقانق… وحتى ساندويش البطاطا بنكهة لبنانية أصيلة. وما فينا ننسى السودة، الدجاج، والنخاعات يلي إلها جمهورها الخاص. وإذا جوعكن كبير، فيكن تروحوا على همبرغر أو تشكن برغر مع بطاطا مقرمشة.
والأحلى؟ الأسعار بعدها معقولة وبتناسب الكل، بين 300 و600 ألف ليرة، يعني فيكن تشبعوا وتبسطوا بطنكن بلقمة خفيفة ع جيبتكن.
الفرع الجديد بخلدة، باتجاه بيروت، حد أبو عرب، جوّا The Grand Centre. يعني سواء رايحين عالجنوب أو راجعين ع بيروت، فيكن توقفوا تاخدوا سندويشة عالسريع أو تطلبوا وتكمّلوا طريقكن.
للطلب: 806 542 01 أو 030 526 03. وما تنسوا تابعوهن ع انستغرام هون.
جربوا الفرع الجديد لأنو رح يصير محطتكن المفضلة!
