7 أماكن ربيعية تزوروها بلبنان قبل ما يخلص أيار!
لبنان بيصير حلو كتير بفصل الربيع، ومشان هيك هيدي الـ 7 أماكن ربيعية لازم تزوروهن قبل ما يخلص أيار، ويوصل حزيران مع شوباتو!
1. محمية الأراضي الرطبة عميق، البقاع الغربي
عنجد أحلى وقت للزيارة هو بشهر أيار، وقت بتكون المحمية مليانة مي عالآخر. والطقس بيكون مثالي لتمشاية خفيفة بالطبيعة، وفي كتير فيّ عالطريق، يعني المشوار مريح وبتستمتعوا بالمناظر وبتشوفوا جواميس المي المهضومين.
2. جسر الحجر، كفردبيان
مكان روعة ومش كتير ناس بيعرفوه بقلب كفردبيان. وإذا من زمان بدكن تشوفوا الشلال المخبى تحت الجسر، هلّق أحلى وقت تروحوا.
3. درب الأمازون، بقعتوتة
“درب الأمازون” ب بقعتوتة بسكنتا، من أجمل المسارات الطبيعية بلبنان، وسمّوه هيك لأنو بيشبه غابات الأمازون بتضاريسه وشجره الكثيف. شو ناطركن هونيك؟ جهزوا الصباط المريح والمعدات لأنو هيدا المسار مش هيّن!
4. شلال شبروح، فاريا
شلال شبروح بفاريا بيكون بأجمل حالاته بشهر أيار، لما تتدفق ميّ الينابيع بعد ما يذوب التلج كلو. الجبال المحيطة بتكون بعدها خضرا ومزهزة، يعني وقت مثالي لتوقفوا وتستمتعوا بالمنظر.
5. بقرزلا، عكار
كمان مكان خيالي ومش معروف بالشمال، وفيه واحد من أجمل شلالات لبنان. بقرزلا بعكار بتحسّها بعدا ع طبيعتها البرية، خصوصي بالربيع وقت بيكون تدفّق المي قوي كتير.
6. الهوّة أو هوة القرنة، وادي قنوبين
وادي قنوبين ببشري هو مسار مشي رائع محاط بالمنحدرات والأديرة والخضار اللي بتحسوا كأنها ما تبدلت عبر زمان. والشلالات هونيك خصوصي بالربيع ما لازم تفوتكن!
7. بحيرات فالوغا
هالوجهة المشهورة بتستاهل تكون ع الليستا لأنو البحيرات النقية والمساحات الخضرا حواليها خيالية. المناظر بتكون أحلى، وهالفترة هي الأنسب لتستمتعوا فيها.
حبيتوا شو اخترنا من أماكن ربيعية بحضن الطبيعة حول لبنان؟ ما تنسوا تابعونا ع انستغرام هون.
