لتخفيف عجقة الويك-اند… منع مرور الشاحنات الكبيرة بهالفترات!

إذا عم تخطط تطلع ع الجبل أو تنزل عالبحر بالعطلة، فطريقك رح يصير أريح شوي. وزارة الداخلية و البلديات أصدرت القرار رقم 791، الموقّع من الوزير أحمد الحجار، بهدف التخفيف من عجقة السير بلبنان، من خلال منع الشاحنات الكبيرة من السير على الطرقات والأوتوسترادات الرئيسية خلال ساعات الذروة بعطلة نهاية الأسبوع.

القرار عملي كتير لكل شخص سبق وعلق ورا شاحنة على الأوتوستراد الساحلي أو بطرقات الجبل الضيقة.

أوقات منع مرور الشاحنات الكبيرة:

أي شاحنة وزنها الإجمالي أكتر من 7.5 طن ممنوع تسير على كل الطرقات الدولية و الرئيسية و الثانوية بلبنان بالأوقات التالية:

• الجمعة: من الساعة 2:00 بعد الضهر لغاية 12:00 بالليل
• الأحد: من الساعة 3:00 بعد الضهر لغاية 12:00 بالليل

هالمواعيد انحطّت تحديداً لأنها بتتزامن مع الوقت اللي الناس فيه بتطلع من بيروت بالعطلة، أو بترجع ع المدينة مسا الأحد.

مين مستثنى من القرار؟

حتى ما تتعطل حركة التموين و الخدمات الأساسية، في شاحنات رح يضل مسموح إلها تسير بهالفترات، ومنها:

• صهاريج المحروقات والغاز ومياه الشرب.
• الشاحنات اللي بتنقل المواشي، الحبوب، القمح، الشعير، الذرة والطحين.
• الشاحنات أو البرادات اللي بتنقل الخضرة والفواكه الطازجة، اللحوم أو الأدوية.
• شاحنات الباطون الجاهز، مضخات الباطون، وشاحنات الزفت.

تنظيم التوصيل داخل المدن

القرار بيعطي المحافظين صلاحية تحديد أوقات خاصة للتوصيل التجاري وجمع النفايات بالمناطق العجقة، خاصةً قرب المدارس و الجامعات و المستشفيات.

وكمان رح تخصّص البلديات أماكن توقف للشاحنات، حتى يقدر السائقين يرتاحوا وينطروا انتهاء فترة المنع بأمان.

تشديد إجراءات السلامة

القرار ما اقتصر على تعديل مواعيد، فرض كمان قواعد أوضح على الشاحنات خلال الأوقات المسموح فيها بالسير. أبرزها:

• الالتزام بالسير بشكل صارم بأقصى يمين الطريق، و التجاوز ممنوع كلياً إلا بحالات الطوارئ القصوى.
• الالتزام بالسرعات القانونية وعدم تجاوز الحمولة المسموح فيها.
• تغطية حمولة الشاحنات المفتوحة، متل الرمل والبحص، بشكل منيح حتى ما توقع عالطريق.

وبإمكان القوى الأمنية السماح بمرور بعض الشاحنات خلال فترة المنع إذا كان في تنسيق مسبق مع غرفة العمليات بالمديرية العامة وما كان في أي خطر على السلامة العامة.

هيدا القرار يعتبر خطوة مهمة للتخفيف من عجقة السير قبل وبعد العطلة، وخاصة على الأوتوسترادات الرئيسية وطرقات الجبل.

فإذا ناوي تطلع الجمعة بعد الضهر أو ترجع الأحد المسا، خليك منتبه لهيدي المواعيد الجديدة.

شوفوا كمان:

”ممنوع أي تكريم لزياد“…ريما الرحباني تهاجم حفلات التكريم!