«ليلة الموسيقى»… شوارع لبنان رح تتحوّل لمسارح مجانية للكل!

إذا الموسيقى هي شغفكن، هالفرصة لإلكن! وزارة الثقافة فتحت باب المشاركة قدام الموسيقيين والمغنين والفرق الموسيقية من مختلف المناطق، ضمن التحضيرات لـ«ليلة الموسيقى» المرتقبة بلبنان.

«ليلة الموسيقى» هي احتفالية وطنية بتجمع الموسيقى والناس، وبتحوّل شوارع لبنان وساحاته ومؤسساته الثقافية لمسارح مفتوحة بتستقبل الجمهور ببلاش. والهدف منها يكون في ليلة موسيقية تجمع اللبنانيين من مختلف المناطق والأذواق ع دقة ونغم واحد، وتسلّط الضو ع المواهب والتجارب الموسيقية المحلية.

مين فيه يشارك؟

والدعوة مفتوحة للمواهب الصاعدة والفنانين المحترفين، كمان الفرق الموسيقية والغنائية، الجوقات والعازفين. يعني أي حدا عنده تجربة أو مشروع موسيقى وحابب يشاركه مع جمهور جديد، فيه يقدّم طلبه.

المطلوب من المشاركين يعرّفوا عن فنّن ويشاركوا فكرة العرض الموسيقي اللي حابين يقدّموه. المشاركة مفتوحة لمختلف الأنماط والتجارب الموسيقية، شرط تكون لبنانية حصرًا.

وبالنسبة لكل موسيقي أو مغني حابب يكون جزء من هالليلة، بعد في وقت للتقديم. آخر مهلة لاستقبال الطلبات هي 1 أيلول 2026، والتقديم بيتم عبر الرابط هون.

المزيد من التفاصيل:

ومن المرتقب تنعمل «ليلة الموسيقى» خلال تشرين الأول 2026، لكن لحد هلّق ما أعلنت الوزارة عن التواريخ النهائية أو الأماكن والمسارح اللي رح تستضيف العروض.

هيدي ممكن تكون فرصتكن لتكونوا جزء من ليلة بتجمع لبنان كلّه ع الموسيقى!

شوفوا كمان:

قانون خاص بالإنفلونسر وصانعي المحتوى بلبنان… قريباً