جولة سياحية مجانية ببيروت بلغة الإشارة!

بيروت مدينة منمشي بشوارعها كل يوم، منمرق حدّ مبانيها القديمة، كنايسها، جوامعها وآثارها… بس بين شارع وشارع، وبين حجر وحجر، في قصص عمرها مئات وآلاف السنين، ويمكن كتار منّا بعد ما بيعرفوها. الأربعاء 23 أيلول، هالقصص رح تنحكى بطريقة مختلفة… بلغة الإشارة من خلال جولة مميزة.

بمناسبة اليوم العالمي للغة الإشارة، مؤسسة أمان عم تنظّم جولة مجانية بقلب بيروت، مخصّصة للأشخاص ذوي الإعاقات السمعية أو النطقية، لتاخدهن برحلة بين شوارع المدينة وتاريخها، من الساعة 3 بعد الضهر للـ7 المسا.

الجولة رح تكون بالتعاون مع المرشدة السياحية سميرة عزو ومترجمة لغة الإشارة سيلين مزنر، ورح ترجع فيكن آلاف السنين لورا، لتكتشفوا كيف كل حضارة مرقت من بيروت وتركت بصمتها فيها.

رح تشوفوا آثار رومانية وفينيقية بعدها مخبّاية بين شوارع المدينة، تمرقوا على كنايس وجوامع قديمة بتحكي عن مراحل مختلفة من تاريخ بيروت، وتكتشفوا تفاصيل وخبايا بوسط البلد يمكن مرقتوا حدّها عشرات المرات من قبل من دون ما تعرفوا قصّتها.

لأربع ساعات، بيروت ما رح تكون بس المدينة اللي منعرفها اليوم. رح تصير مجموعة حكايات وحضارات مرقت من هون، أبنية تغيّرت، وأماكن بقيت شاهدة على كل شي صار حواليها.

والأحلى إنّه بهالنهار، تاريخ بيروت رح ينحكى بلغة بتوصل للكل، حتى تكون فرصة اكتشاف المدينة وتاريخها تجربة أقرب، أسهل وأشمل. المشاركة مجانية، والمرافقين والمرافقات مرحّب فيهن، بس الأماكن محدودة، كرمال هيك التسجيل ضروري عبر الرابط هون.

بيروت اللي منمرق فيها كل يوم، بهالجولة رح نشوفها بطريقة جديدة.

شوفوا كمان:

بتعرفوا مطار بيروت فيه غرفة حسّية للولاد اللي عندن توحّد؟