كراج بيّ البنات…بيّ لبناني قرر يعلّم كل البنات أساسيات السيارات

إنك تروحي عند الميكانيكي كبنت فيا تكون تجربة بتوتّر، خاصةً لما ما نكون عارفين شو المشكلة بالزبط بسيّارتنا، ونخاف ما ياخدونا بجدّية أو يطلبوا منّا ندفع أكتر من اللازم على تصليحات ما منحتاجها.

من هون إجت فكرة كراج بيّ البنات، اللي أسّسه بيّ لبناني عنده 5 بنات، ليعلّم البنات أساسيات السيارات بطريقة بسيطة وعملية، ويخلّيهن يفهموا أكتر شو عم يصير بسيّارتهن، من دون ما يضطروا يتصلوا ببيّن كل ما حسّوا إنو في شي مش طبيعي.

بفيديوهاته، بيشرح أهم الشغلات اللي لازم كل بنت تعرفها عن سيّارتها، من القطع الأساسية اللي موجودة تحت غطا السيارة، لكيفية عمل فحص بسيط، وصولًا لإشارات التحذير اللي بتظهر عالتابلو وشو بتعني كل منها.

الفكرة مش إنك تصيري ميكانيكية، قد ما هي إنك تصيري مرتاحة أكتر مع سيّارتك: تعرفي تفتحي الغطا، تتعرّفي عالأشيا اللي جوا، ويصير عندك فكرة أوضح عن شو عم يصير فيها.

يعني شغلات ممكن تبين معقّدة بالأول، بتصير أسهل لما تنشرح خطوة بخطوة، ومع شوية من الهضامة تبع البيّات.

تأكدوا تتابعوا Garage Bay El Banet على إنستغرام لدروس تفصيلية أكتر. شكراً عمو!

شوفوا كمان:

غلوريا بلّشت من مطبخ بيتها وعم تقدّم حلويات صحية