معرض ماركات، منتجات كورية، وتجربة سيفورا…شو جديد عالم الجمال بلبنان؟

إذا بتحبّوا المكياج و العناية بالبشرة، في شغلات جديدة عم تصير بعالم الجمال بلبنان! من معارض بتجمع ماركات مختلفة، لمحلات جديدة للمنتجات العالمية، وماركات لبنانية عم تتوسّع. جمعنا 4 أخبار جديدة عن عالم الجمال، يمكن يكون في شي منن بعد ما عرفتوا فيه!

1. معرض Centro Beauty ناطركن هالويك إند

من 23 لـ25 تشرين الأول، رح تلاقوا معرض Centro Beauty Exhibition بالطابق الأرضي من سنترو مول بالجناح. رح يجمع المعرض ماركات مختلفة للمكياج، والعناية بالبشرة، والعطور، يعني فيكن تلاقوا كل شي بتحبّوه بمحل واحد! المعرض بيفتح يومياً من 1 الضهر للـ9 المسا.

وكمان، المعرض هدفه يدعم التوعية بسرطان الثدي، ورح يروح جزء من الأرباح لدعم مبادرات التوعية والجمعيات المعنية بهالقضية. فيكن تعرفوا كل التفاصيل هون.

2. متجر جديد للمنتجات الكورية فتح ببيروت

إذا بتحبّوا منتجات العناية بالبشرة الكورية، صار فيكن تزوروا Sisters Glow ببيروت! المتجر أسّسته أختين بيحبّوا البشرة الزجاجية، وصار بإمكانكن تلاقوا عندن مجموعة من الماركات الكورية، من المنتجات المشهورة لخيارات ما بتلاقوها بسهولة.

وعندن كمان منتجات بتساعد بالعناية بمشاكل البشرة المختلفة، يعني إذا عم تدوّروا على إضافات جديدة لروتين العناية بالبشرة، صار عندكن محل جديد تكتشفوه!

3. ماركة Antati عم تتوسّع مع محلّين جداد بلبنان

الماركة اللبنانية للعناية بالبشرة Antati عم تكبر، وصار عندها محل جديد بزحلة، بالإضافة لبوتيك كبير بعاليه مساحته 1,000 متر مربّع، وفيه مختبر حديث.

هالتوسّع بيعني إنو صار أسهل على محبّي العناية بالبشرة بمناطق مختلفة يلاقوا منتجات Antati، المعروفة بتركيباتها المناسبة للبشرة العربية. فيكن تعرفوا أكتر عن المحلّين الجداد هون.

4. SBRANDS فتحت فرعها التاني بفردان!

بعد فرعها بالحازمية، صارت SBRANDS موجودة كمان بفردان، وتحديداً بـVerdun 732!

المتجر بيجمع أكتر من 200 ماركة عالمية للمكياج، والعناية بالبشرة، والعطور، بمساحة واسعة وتصميم بيذكّر بمتاجر سيفورا. يعني إذا بتحبّوا تكتشفوا ماركات جديدة وتجرّبوا منتجات شهيرة، صار فيكن تزوروا الفرع الجديد وتستكشفوا كل الخيارات الموجودة فيه.

حبيتوا شو جديد عالم الجمال بلبنان؟ تابعوا قسم التسوّق ع موقعنا لتعرفوا كل جديد.

شوفوا كمان:

هيك أسعار آيفون 18 الجديد بلبنان حاليًا