كل خميس، تبني قطط من هالمحل بالحمرا!

في كتير قطط بلبنان ناطرة حدا يعطيها بيت دافي ومليان حبّ. وكرمال يساعدوا هالقطط تلاقي عيل تحبّها، عم يتعاون محل Multiverse بالحمرا مع مركز Meow Haven، المعروف بإنقاذ البسينات والاهتمام فيها بصيدا. كل نهار خميس، بيستقبل المحل مجموعة من القطط اللي أنقذها المركز، لتقدروا تتعرّفوا عليها، تلعبوا معها، ويمكن تلاقوا رفيق جديد يكمّل عيلتكن!

هاللقاء الأسبوعي مش بس فرصة لتقضوا وقت حلو مع البسينات، بس كمان لدعم Meow Haven من خلال التبرّعات، و مساعدته يكمّل شغله بإنقاذ القطط و العناية فيها وتأمين بيوت مناسبة إلها.

وخلال الحرب، فتح Meow Haven أبوابه كمان لقطط العيل النازحة، وسعى لإنقاذ بسينا انتركت بالمناطق المتضرّرة. أمّنلها مكان آمن واهتمّ فيها ببلاش، على أمل ترجع تلتقي بأصحابها أول ما يقدروا يرجعوا على بيوتن.

شو ناطركن بـ Meowverse؟

كل نهار خميس، من الساعة 4 بعد الضهر للـ 10 بالليل، فيكن تزوروا Multiverse وتقضوا وقت مع البسينات، اللي رح تلاقوا إلها ألعاب للتسلّق و الخربشة، وأغراض بتسلّيها. كمان فيكن تكتشفوا مجموعة من الأغراض و الإكسسوارات المميّزة الموجودة بالمحل. رسم الدخول بس 5$، وكل المبلغ بيروح لدعم Meow Haven ومركز التبنّي التابع إلو.

والحلو إنو فيكن تستغلّوا الزيارة لتلعبوا كمان بألعاب الطاولة الموجودة بـ Multiverse! وتقضوا وقت مسلّي بين اللعب و الهضامة مع البسينات. وإذا بتحبّوا القصص المصوّرة، و المجسّمات، ومنتجات الأنمي، فيكن تتسوّقوا من الأغراض المميّزة الموجودة بالمحل.

وإذا بدكن شي تشربوه أو تاكلوا لقمة خفيفة، فيكن تطلبوا من Checkpoint، الكافيه اللي بيقدّم مشروبات وسناكات، و تكمّلوا قعدتكن الحلوة مع الرفقات و البسينات.

تفاصيل الحدث

📍 العنوان

Multiverse بالحمرا، مقابل مخبز الكبوشية

اكبسوا هون لتعرفوا الموقع بالزبط.

⏰ التاريخ والوقت

كل نهار خميس من الساعة 4 بعد الظهر للساعة 10 بالليل

لمعلومات أكتر، تابعوا Multiverse وMeow Haven على إنستغرام!

شوفوا كمان:

بيت بيروتي قديم بالأشرفية مخبّي ورا جنينة وكافيه حلو!